Yuuda ñɩma tɔkaɣ Paska kazandʋ Nisaŋ fenaɣ kɩyakʋ 14 ñɩŋgʋ wiye paa pɩnaɣ ŋga. Kazandʋ ndʋ tɩtɔzaɣ-wɛ ɛzɩma Yehowa lɩzɩ-wɛ yomiye taa Ejipiti nɛ ewoni-wɛ Kanaŋ ɛjaɖɛ taa yɔ. Pɩtalɩ pɩnaɣ 33 lɛ, Yesu nɛ apostoloowaa pɔtɔɔ Paska Yeruzalɛm ɛsɔdaa kuduyuu nakʋyʋ tɛɛ. Pɛtɛm tɔɔʋ lɛ, Yesu heyi-wɛ se: ‘Mɩ-taa kʋyʋm kaɣ ma-wayɩ lɩʋ.’ Pɩɖɩɣzɩ apostoloowaa siŋŋ nɛ pɔpɔzɩ-ɩ se: ‘Ða-taa anɩ?’ Yesu cosi-wɛ se: ‘Ɛnʋ lɛ, weyi mɛncɛlɩɣ-ɩ kpɔnʋ kʋnɛ yɔ.’ Nɛ ɛkɛzɩ kpɔnʋ nɛ ɛcɛlɩ Yudaasɩ Isɩkarɩyɔɔtɩ. Kpaagbaa mbʋ lɛ, Yudaasɩ Isɩkarɩyɔɔtɩ kʋyɩ nɛ ɛlɩɩ.

Yesu tɩmɩ nɛ ɛkpaɣ kpɔnʋ nɛ ɛpɛlɩ nɛ ɛtayɩ ɛ-apostoloowaa. Eheyi-wɛ se: ‘Ɩtɔɔ kpɔnʋ kʋnɛ. Kɩsɩŋnɩ mon-tomnaɣ ŋga mankaɣ laʋ mɩ-yɔɔ yɔ.’ Pʋwayɩ lɛ, ɛtɩmɩ vɛɛ yɔɔ nɛ ɛcɛlɩ-wɛ nɛ eheyi-wɛ se: ‘Ɩñɔɔ vɛɛ kʋnɛ. Kɩsɩŋnɩ man-calɩm mbʋ mankaɣ kpɛdʋʋ kɩwɛɛkɩm kpeɣu yɔɔ yɔ. Meheyiɣ-mɩ se ma nɛ mɩ ɖɩkaɣ kɛʋ awiya ɛsɔdaa. Ɩlakɩ sɔnzɩ sɩnɛ paa pɩnaɣ ŋga nɛ ɩtɔzʋʋ mɔ-yɔɔ.’ Kpaɣnɩ mbʋ lɛ, Yesu tɔmkpɛlɩkɩyaa lakɩ sɔnzɩ nzɩ paa pɩnaɣ ŋga. Ŋsɩm sɔnzɩ nzɩ sɩ-hɩɖɛ na? Payaɣ-sɩ se Kɩbaɣlʋ Tɔɔnaɣ Tɔɔʋ sɔnzɩ.

 Apostoloowaa mba paakazaa yɔ, pa nɛ Yesu pɛtɛm sɔnzɩ nzɩ labʋ lɛ, paɖaɣnɩ paɣzʋʋ tɔm hɔm se pana se pa-taa lɛ, akɛ sɔsɔ. Ɛlɛ Yesu heyi-wɛ se: ‘Mɩ-taa weyi ɛpɩsɩɣ ɛ-tɩ ɛzɩ pɩɣa ɛjam, pʋ-tɔbʋʋ se weyi paa anɩ ɛkɩlɩ-ɩ yɔ, ɛnʋ kɛɣnɩ mɩ-taa sɔsɔ.’

‘Ɩkɛ man-taabalaa. Meheyiɣ-mɩ ndʋ payɩ ma-Caa sɔɔlaa se meheyi-mɩ yɔ. Piileɖiɣ lɛ, mankpaɣ man-Caa cɔlɔ. Nɛ maakpɛndɩɣnɩ-mɩ lɛɛlɛɛyɔ. Ɛlɛ sɔɔlɩm mbʋ ɩwɛɣnɩ ɖama yɔɔ yɔ, mbʋ pakaɣ-mɩ tɩlɩnʋʋ se mɩkɛnɩ mɔn-tɔmkpɛlɩkɩyaa. Ɩsɔɔlɩ ɖama ɛzɩ mɔnsɔɔlʋʋ-mɩ yɔ.’

Pɩtɛma lɛ, Yesu tɩmnɩ Yehowa se ehuuzi ɛ-tɔmkpɛlɩkɩyaa yɔɔ. Ɛpɔzɩ Yehowa se ɛsɩnɩ-wɛ nɛ pala tʋma nɔɔ kʋyʋmaɣ nɛ laŋhɛzɩyɛ taa. Ɛtɩmaa ɖɔɖɔ se Yehowa hɩɖɛ ɛsɛɛ. Pʋwayɩ lɛ, Yesu nɛ ɛ-apostoloowaa petee hendu nɛ pasa Yehowa nɛ palɩɩ nɛ pɛɖɛɛ. Lɛɛlɛɛyɔ, Yesu kpaʋ alɩwaatʋ ñɔtɩ kpam.