DILONGI 87
Madia ya Nsuka ya Nkokila ya Yezu
Bayuda vandaka kuta nkinsi ya Paki konso mvula na kilumbu ya 14 ya ngonda ya Nisani. Yo vandaka kuyibusa bo mutindu Yehowa katulaka bo na kimpika na Ezipte mpi kotisaka bo na Ntoto ya Lusilu. Na mvu 33 T.B., Yezu ti bantumwa na yandi salaka Paki na suku mosi ya zulu na Yeruzalemi. Na nsuka ya madia yina, Yezu tubaka nde: ‘Muntu mosi na kati na beno ta teka mono.’ Bantumwa waka mpasi, mpi bo yulaka Yezu nde: ‘Nani yango yina?’ Yezu tubaka nde: ‘Yo ke muntu yina mu ke pesa dimpa yai.’ Ebuna yandi pesaka Yudasi Iskariote kitini ya dimpa. Na mbala mosi, Yudasi telamaka mpi basikaka.
Na nima, Yezu salaka kisambu, zengaka dimpa bitini-bitini, mpi pesaka yo na bantumwa yina bikalaka. Yandi tubaka nde: ‘Beno dia dimpa yai. Yo ke monisa nitu na mono, yina mono ta pesa sambu na beno.’ Na nima yandi sambaka sambu na vinu, mpi pesaka yo na bantumwa. Yandi tubaka nde: ‘Beno nwa vinu yai. Yo ke monisa menga na mono, yina mono ta pesa sambu masumu na beno kulolulama. Mono ke sila nde beno ta vanda bantotila ti mono na zulu. Beno salaka mutindu yai konso mvula sambu na kuyibuka mono.’ Balongoki ya Yezu ke vukanaka na nkokila yina konso mvula. Bubu yai, bo ke bingaka lukutakanu yina Madia ya Nkokila ya Mfumu.
Na nima ya madia, bantumwa swanaka sambu na kuzaba nani ke mfunu mingi na kati na bo. Kansi Yezu songaka bo nde: ‘Muntu yina me luta nene na kati na beno kele muntu yina ke kudimona bonso leke, muntu ya kukonda mfunu.
‘Beno kele banduku na mono. Mono ke songa beno mambu yonso yina Tata na mono ke zola nde mu zabisa beno. Ntama ve mono ta kwenda na zulu na kisika ya Tata na mono. Beno ta bikala, mpi bantu ta zaba nde beno kele balongoki na mono na zola yina beno ta monisana. Beno fwete zolana mutindu mono ke zolaka beno.’
Nsuka-nsuka, Yezu sambaka, mpi lombaka Yehowa na kutanina balongoki yonso. Yandi lombaka Yehowa na kusadisa bo na kusala kumosi na ngemba. Yandi sambaka sambu zina ya Yehowa kuvanda santu. Ebuna Yezu ti bantumwa yimbaka bankunga ya kukumisa Yehowa mpi bo basikaka. Ntangu finamaka sambu bo kanga Yezu.
“Kuwa boma ve, kimvuka ya fioti, sambu Tata na beno me ndimaka na kupesa beno Kimfumu.”—Luka 12:32
Nge Lenda Sepela Mpi Ti
YEZU KELE NZILA, KIELEKA, MPI LUZINGU
Madia ya Nkokila ya Mfumu
Yezu me sala lusungiminu yina balongoki na yandi ta salaka konso mvula na kilumbu ya Nisani 14.
YEZU KELE NZILA, KIELEKA, MPI LUZINGU
Yezu Me Longa Kudikulumusa na Paki ya Nsuka
Bantumwa me yituka ntangu bo me mona Yezu me sala kisalu yina mpika fwete sala.
YEZU KELE NZILA, KIELEKA, MPI LUZINGU
Kisambu ya Yezu ya Nsuka na Suku ya Zulu
Yandi me monisa pwelele nde katula kugulusa bantu yandi me sala diambu mosi ya mfunu mingi kuluta.
BANGIUFULA YINA BANTU KE YULAKA MINGI
Sambu na Nki Bambangi ya Yehowa Ke Salaka Ve Nkinsi ya Madia ya Mfumu Bonso Mabundu ya Nkaka?
Madia ya Mfumu to Nkinsi ya Kuyibuka Lufwa ya Yezu kele nkinsi ya kuluta santu mpi mfunu sambu na Bambangi ya Yehowa. Tala mambu yina Biblia ke tubaka sambu na nkinsi yai.
