တၢ်မၤလိ ၈၇
ယ့ၣ်ၡူးအီၣ်ဟါတၢ်အီၣ် အလီၢ်ခံကတၢၢ်တဘျီ
ပှၤယူဒၤဖိမၤဝဲဘူၣ်လဲၤကပာ်လၢ လါနံစၣ် ၁၄ သီကိးနံၣ်ဒဲးလီၤ. ဘူၣ်လဲၤကပာ်အံၤ ဒုးသ့ၣ်နီၣ်ထီၣ်က့ၤအဝဲသ့ၣ်လၢ ယဟိဝၤယွၤမၤပူၤဖျဲးအဝဲသ့ၣ်လၢ ကုၢ်အလီၢ်လၢကီၢ်အဲၤကူပတူးအပူၤ ဒီးဆှၢအဝဲသ့ၣ်ဆူ ကီၢ်တၢ်စံးပာ်အပူၤလီၤ. ဖဲ ခ.န. ၃၃ နံၣ်လၢ ဝ့ၢ်ယရူၤၡလ့ၣ်အပူၤန့ၣ် ယ့ၣ်ၡူးဒီးအတၢ်မၢဖိတဖၣ် မၤဝဲဘူၣ်လဲၤကပာ်လၢ ဒၢးတဖျၢၣ်လၢဟံၣ်ဖီခိၣ်န့ၣ်လီၤ. ဖဲအီၣ်တၢ်ဝံၤအခါ ယ့ၣ်ၡူးတဲဝဲလၢ– ‘ပှၤလၢသုကျါတဂၤန့ၣ် ကဆါလီၤကွံာ်ယၤလီၤ.’ တၢ်မၢဖိတဖၣ်ဖုးဘၣ်အသး ဒီးသံကွၢ်ယ့ၣ်ၡူးလၢ– ‘ကမ့ၢ်မတၤတဂၤလဲၣ်.’ ယ့ၣ်ၡူးတဲဝဲလၢ– ‘အဝဲကမ့ၢ်ပှၤတဂၤလၢ ယဟ့ၣ်လီၤအီၤလၢကိၣ်န့ၣ်လီၤ.’ ဝံၤဒီး ယ့ၣ်ၡူးဟ့ၣ်လီၤ စီၤယူဒၤအံၣ်စကၤရံၤအိာ်လၢ ကိၣ်လီၤ. တဘျီဃီန့ၣ် စီၤယူဒၤအံၣ်စကၤရံၤအိာ် ဟးထီၣ်ကွံာ်ဝဲလၢဒၢးပူၤလီၤ.
ဝံၤဒီး ယ့ၣ်ၡူးဃ့ဘါထုကဖၣ်တၢ်, ဘိးကၢ်ကိၣ်တနီၤဒီး ဟ့ၣ်လီၤဝဲဆူအတၢ်မၢဖိ လၢအအိၣ်တ့ၢ်တဖၣ်န့ၣ်လီၤ. ယ့ၣ်ၡူးတဲဝဲလၢ– ‘အီၣ်ကိၣ်အံၤတက့ၢ်. ကိၣ်အံၤမ့ၢ်တၢ်ပနီၣ်လၢ ယနီၢ်ခိအဂီၢ်လၢ ယကဟ့ၣ်လီၤလၢသုဂီၢ်လီၤ.’ ဝံၤဒီး ယ့ၣ်ၡူးဃ့ဘါထုကဖၣ်တၢ်လၢ စပံးထံအဂီၢ် ဒီးဟ့ၣ်လီၤဝဲဆူအတၢ်မၢဖိတဖၣ်အအိၣ်လီၤ. ယ့ၣ်ၡူးတဲဝဲလၢ– ‘အီစပံးထံအံၤတက့ၢ်. စပံးထံအံၤမ့ၢ်တၢ်ပနီၣ်လၢ ယသွံၣ်အဂီၢ်လၢ ယကဟ့ၣ်လီၤဒ်သိး ပှၤဟီၣ်ခိၣ်ဖိအတၢ်ဒဲးဘး ကဘၣ်တၢ်ပျၢ်ကွံာ်အီၤအဂီၢ်လီၤ. ယအၢၣ်လီၤသုလၢ သုကကဲထီၣ်စီၤပၤဃုာ်ဒီးယၤလၢမူခိၣ်လီၤ. ကိးနံၣ်ဒဲး သုကဘၣ်မၤဒ်အံၤလၢ တၢ်သ့ၣ်နီၣ်ထီၣ်က့ၤယၤအဂီၢ်လီၤ.’ လၢတၢ်န့ၣ်အဃိ ယ့ၣ်ၡူးအပျဲၢ်အဘီၣ်တဖၣ် မၤဝဲတၢ်သ့ၣ်နီၣ်ထီၣ်က့ၤအံၤကိးနံၣ်ဒဲးလီၤ. ခဲအံၤ တၢ်သ့ၣ်နီၣ်ထီၣ်က့ၤအံၤ ဘၣ်တၢ်ကိးအီၤလၢ ကစၢ်အတၢ်အီၣ်လၢဟါအီၣ်လီၤ.
ဖဲကစၢ်အတၢ်အီၣ်လၢ ဟါအီၣ်ဝံၤအလီၢ်ခံ တၢ်မၢဖိတဖၣ် တဲအါလိာ်အသး ဘၣ်ဃးဒီး မ့ၢ်မတၤတဂၤမ့ၢ်ပှၤလၢ အဒိၣ်ကတၢၢ်တဂၤလဲၣ်. ဘၣ်ဆၣ် ယ့ၣ်ၡူးတဲဘၣ်အဝဲသ့ၣ်လၢ– ‘ပှၤတဂၤဂၤလၢအပာ်လီၤအသးလၢ အဆံးကတၢၢ်တဂၤန့ၣ် ကမ့ၢ်ပှၤလၢအဒိၣ်ကတၢၢ်တဂၤလီၤ.’
‘သုမ့ၢ်ယတံၤသကိးတဖၣ်လီၤ. ကယဲၢ်တၢ်လၢယပၢ်အဲၣ်ဒိးလၢ ယတဲဘၣ်သုန့ၣ် ယတဲဘၣ်သုခဲလၢာ်လီၤ. တယံာ်လၢၤဘၣ်န့ၣ် ယကက့ၤထီၣ်ဆူယပၢ်အအိၣ်လၢမူခိၣ်လီၤ. ဘၣ်ဆၣ် သုကအိၣ်ဒံးဖဲအံၤလီၤ. ဒီးသုမ့ၢ်အဲၣ်လိာ်သုသးတဂၤဒီးတဂၤန့ၣ် ပှၤဂီၢ်မုၢ်ကသ့ၣ်ညါဝဲလၢ သုမ့ၢ်ယပျဲၢ်ယဘီၣ်လီၤ. သုကဘၣ်အဲၣ်လိာ်သုသးတဂၤဒီးတဂၤ ဒ်ယအဲၣ်သုအသိးလီၤ.’
လၢခံကတၢၢ်န့ၣ် ယ့ၣ်ၡူးဃ့ဘါထုကဖၣ်တၢ် ဒီးဃ့ဝဲလၢယဟိဝၤယွၤကဒီသဒၢ အပျဲၢ်အဘီၣ်ခဲလၢာ်လီၤ. ယ့ၣ်ၡူးဃ့ဝဲလၢယဟိဝၤယွၤ ကမၤစၢၤအပျဲၢ်အဘီၣ်ဒ်သိး ကမၤသကိးတၢ် ဃူဃူဖိးဖိးအဂီၢ်လီၤ. ဒီးယ့ၣ်ၡူးဃ့စ့ၢ်ကီးဝဲလၢ ယဟိဝၤယွၤအမံၤ ကဘၣ်တၢ်ပာ်စီဆှံအီၤစ့ၢ်ကီးလီၤ. ဝံၤဒီးယ့ၣ်ၡူးဒီးအပျဲၢ်အဘီၣ်တဖၣ် စံးထီၣ်ပတြၢၤယဟိဝၤယွၤလၢတၢ်သးဝံၣ်ဒီး လဲၤထီၣ်ဝဲလၢတၢ်ချၢန့ၣ်လီၤ. တၢ်ဆၢကတီၢ်လၢ ပှၤကဟဲဖီၣ်ယ့ၣ်ၡူးန့ၣ် ဘူးထီၣ်ဝဲလံ.
“သိလၢအစှၤတဖုဧၢ, ပျံၤတၢ်တဂ့ၤ, အဂ့ၢ်ဒ်အံၤ, ဘၣ်သုပၢ်အသးလၢ အကဟ့ၣ်သုလၢဘီဧိၤမုၢ်ဧိၤန့ၣ်လီၤ.”—လူၤကၣ် ၁၂:၃၂
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် မၤဝဲကစၢ်အတၢ်အီၣ်လၢ ဟါအီၣ်န့ၣ် ဘၣ်မနုၤအဃိ လီၤဆီလိာ်အသးဒီး တၢ်ဘူၣ်တၢ်ဘါလၢ အဂၤတဖၣ်လဲၣ်.
ဘၣ်တၢ်ကိးစ့ၢ်ကီးအီၤလၢ တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံ, ဒီးမ့ၢ်မူးပွဲလၢ အရ့ဒိၣ်ကတၢၢ်လၢ ယဟိဝၤပှၤအုၣ်အသး တဖၣ်အဂီၢ်လီၤ. သမံသမိးကွၢ် ဘၣ်ဃးဒီး မူးပွဲအံၤအဂ့ၢ်န့ၣ် လံာ်စီဆှံစံးဝဲ ဒ်လဲၣ်န့ၣ်တက့ၢ်.
