Vajuda ngava dana nkenye mvhura sipito soPaska mezuva 14 lyokwedi kwaNisani. Eyi ngayi va diworokesa omu Jehova ga va mangwilire moupika waEgipite nokuvatwara moSirongo sEtumbwidiro. Momvhura 33, Jesus novapositoli vendi kwa rugene Paska konzugo zekeguru moJerusarema. Apa va mene, Jesus ta tanta asi: ‘Mukweneni gumwe na horora nge.’ Vapositoli kwa tukukire, nokupura Jesus asi: ‘Yilye mwene ogo?’ Jesus ta limburura asi: ‘Googu nani pa mboroto ezi.’ Makura ta pe sintau somboroto Judasa Isikalyoto. Poopo ngoso, Judasa ta katuka makura ta pwaga mo monzugo.

Jesus ta kanderere, ta gusa mboroto ta zi bamagura, ta zi pe vapositoli ava va hupire po. Age ta tanta asi: ‘Guseni mu lye. Azo kufanekesa rutu rwange oru ngani mu pa.’ Makura ta kanderere hena, ta gusa nkinda, ta zi pe vapositoli vendi. Ta tanta asi: ‘Nwaa-nweni mo. Yeeyi ezi yizo honde zange, ezi ngazi tjikangerera wovanzi morwa edongononopo lyononzo. Ame kuna kumutumbwidira asi ngomu ka kara vahompa kumwe name meguru. Omu yi rugane nkenye mvhura mokudiworokera nge po.’ Vasikuli vaJesus simpe kurugana silika oso nkenye mvhura. Silika oso ngesi kusitumbura asi Murarero gwaHompa.

 Konyima zoyo, vapositoli kwa lipatanene asi yilye munene po mokatji kawo. Jesus ta va tantere asi: ‘Mukurona po pokatji keni a fane ngwendi yige munona po, ano mupitisili a kare ngwendi mukareli.

‘One vakaume vange. Morwa na mu tantera nayinye eyi na zuvha kwaTate gemeguru. Ntaantani ni ze kwaTate. One mouzuni mwa kara, nye nsene mu lihara-hara yipo ngava divira vantu asi one sili varongwa vange. Omu lihara-hare moomu na mu hara ame.’

Jesus kwa kanderere hena a hundire Jehova a popere varongwa navenye. Ntani asi Jehova a va vatere va ruganene kumwe mombili. Age kwa kanderere hena asi edina lyaKarunga va lipongore. Makura Jesus novapositoli vendi tava dimbi rusumo rokupandura Jehova, tava pwaga. Siruwo sokukwata Jesus kwa kere pepi nokusika mo.