Majuda nebaezanga mukiti wa Paseka silimo ni silimo fa lizazi labu 14 mwa kweli ya Nisani. Mukiti wo neu batusanga kuhupula mwanaa batuselize Jehova kuzwa mwa butanga mwa Egepita ni kubaisa mwa Naha ya Sepiso. Mwa silimo sa 33 C.E., Jesu ni baapositola bahae nebaezize mukiti wa Paseka mwa muzuzu wa kwahalimu mwa Jerusalema. Kwa mafelelezo a mulalelo, Jesu ali: ‘Yomuñwi ku mina uka nibeteka’. Baapositola nebakomokile hahulu kuutwa cwalo, mi babuza Jesu kuli: ‘Ki mañi?’ Jesu kihaa li: ‘Ki yenika fa sinkwa se.’ Cwale Jesu afa sikwa seo ku Judasi Isikariota. Honafo feela, Judasi ayema mi azwa mwa muzuzu.

Cwale Jesu alapela, akomauna sinkwa kusieza buemba-emba, mi kihona asitambeka baapositola bahae babañwi. Abulela ali: ‘Muce sinkwa se. Siyemela mubili waka, ili onika mifa.’ Cwale alapelela waine mi aifa kwa baapositola bahae. Kihaa li ku bona: ‘Hamunwe waine ye. Iyemela mali aka, ili enikafa kuli libi zamina liswalelwe. Nimisepisa kuli lukabusa hamoho sina malena mwa lihalimu. Muezange cwalo silimo ni silimo kuli munihupule.’ Balateleli ba Jesu nebakopananga hamoho fa lizazi leliswana leo silimo ni silimo. Mukopano wo kacenu ubizwa kuli ki Mulalelo wa Mulena.

 Hamulaho wa mulalelo, baapositola bakananisana ka za kuli ki mañi wa butokwa hahulu mwahalaa bona. Kono Jesu ababulelela kuli: ‘Yomutuna mwahalaa mina ki yaikunga kuli ki yomunyinyani ka kufitisisa, yaipeya kwatasi.

‘Mu balikani baka. Nimibulelela lika kaufela zabata Ndate kuli nimitaluseze. Nituha niya ku Ndate kwa lihalimu. Mina mukasiyala, mi batu bakaziba kuli mu balutiwa baka haiba mulatana mwahalaa mina. Muswanela kulatana mwahalaa mina sina feela moni milatezi.’

Kwa mafelelezo, Jesu alapela, akupa Jehova kuli asileleze balutiwa kaufela. Naakupile Jehova kuli abatuse kusebelisana hamoho ka kozo. Naakupile kuli libizo la Jehova likeniswe. Cwale Jesu ni baapositola bahae baopela milumbeko ku Jehova mi hasamulaho bazwela fande. Nako neisutelezi ya kuli Jesu atamiwe.