AYudeya anukileña Chipandakenu hachaaka-hachaaka hefuku damu 14 dakakweji kaNisani. Ichi chawija chayanukishileña Yehova chayifumishiliyi muwuduñu muEjipitu nakuyileta Mwituña daChikaninu. Muchaaka cha 33 C.E., Yesu niapostolu indi ekalili nachawija chaChipandakenu mukapeka kahewulu muYerusalema. Hakumanisha kuda, Yesu wahosheli nindi: ‘Wumu hakachi kenu wukunfukejela.’ Apostolu ahayamini, nawa amwihwili Yesu nawu: ‘Hinyi yenowu?’ Yesu wayakwili nindi: ‘Yowu iyala inukwinka idi dinkendi.’ Kuhiñahu wamwinkeli Yudasi Isakaroti dinkendi. Hohenohu, Yudasi wanyamukili nakufuma mukapeka.

Kufumahu Yesu walombeli, wahumwini dinkendi, nawa wayinkeli apostolu ashalilihu. Wayilejeli nindi: ‘Denu idi dinkendi. Dinakwimenaku mujimba wami, wunukuhana kukoola enu.’ Kuhiñahu walombeli havinyu nawa wayinkeli apostolu indi. Wayilejeli nindi: ‘Nwenu iyi vinyu. Yinakwimenaku mashi ami, inukuhana kulonda ayanakeni nshidi. Nayishiiki nami mwakekala anyanta nanami mwiwulu. Ilenuña mwenimu hachaaka-hachaaka hakuñanuka.’ Akakumulondela Yesu anatwalekihu kubulakana hamu hanidi ifuku namelela hachaaka-hachaaka. Iku kupompa ichi akutenaña nawu Kuda kwaMwanta kwaMelela!

 Chamanishiliwu kuda, apostolu atachikili kutaadeka kulonda eluki wadiña walema hakachi kawu. Ilaña Yesu wayilejeli nindi: ‘Wabadika chikupu hakachi kenu yowu wadimonaña kwikala kansi hadi ejima, wakehelamu chikupu.

‘Enu mudi amabwambu jami. Nayilejaña yuma yejima yakeñañayi Tata yami nindi niyileji. Katataka inakuya kudi Tata yami mwiwulu. Munakushala nawa antu akayiluka nawu mudi atumbanji twami, muloña wakukeña kumwadimwekeshelaña. Mwatela kukeñañana neyi chinayikeña enu.’

Nkumininaku, Yesu walombeli nakumuleja Yehova nindi ayikiñeña atumbanji ejima. Wamulombeli Yehova nindi ayikwashi azatileña hamu mukuwunda. Walombeli nindi ijina daYehova adijiliki. Kufumahu Yesu nawatumbanji twindi embili tumina twakumushimeka Yehova nawa edikili hanji. Mpinji yakumukwata Yesu yadiña kwakwihi.