Aʼye aj Judiy in kubʼtoq kyikʼsaʼn aju Xjan Qʼij tkyaqil abʼqʼi toj 14 te t-xjawil nisán. Iktzun tten in kubʼtoq kynaʼn aju tej kyetz tiʼn Jehová toj Egipto tej ateʼtoq te majen ex tej kyxi tiʼn toj Txʼotxʼ otoq tzaj Tziyen kye. Toj abʼqʼi 33, kubʼ tikʼsaʼn Jesús ex qe t-apóstol aju Xjan Qʼij toj jun ja tjax toj tkabʼ kol te jun ja toj tnam Jerusalén. Tej kybʼaj waʼn, xi tqʼamaʼn Jesús kye: «Jun kyxole kxel qʼonte weye toj kyqʼabʼ xjal». E jaw labʼin qe apóstol tiʼj jlu ex xi kyqanin te: «¿Alkyetzun?». Xi ttzaqʼweʼn Jesús: «Aju xjal kxel nqʼoʼne piẍ wabʼj lu te». Xitzun tqʼoʼn jun piẍ wabʼj te Judas Iscariote. Jawtzun weʼ naj Judas ex el bʼet.

Yajxitl ok tqʼoʼn Jesús jun naʼj Dios, kubʼ tpiẍen jun wabʼj ex xi tsipen kye t-apóstol e kyaj ten tukʼil. Xi tqʼamaʼn kye: «Kywanxe wabʼj lu. Atzun techel nxmilale jlu, aju kxel nqʼoʼne kyiʼje». Tej tikʼ chʼintl ambʼil, ok tqʼoʼn jun naʼj Dios tiʼj vin, xi tqʼoʼn kye apóstol ex xi tqʼamaʼn kye: «Kykʼanxe kʼabʼj lu. Atzun techel nchkʼele jlu, aju kxel nqʼoʼne tuʼntzun tkubʼ najsaʼn kyile. Kxel ntziyene kyeye qa che kawile wukʼile toj kyaʼj. Kybʼinchame jlu tkyaqil abʼqʼi te nabʼil weye». Toj ambʼil jaʼlo, kukx in nok kychmon kyibʼ qeju lepcheqeʼk tiʼj Jesús tkyaqil abʼqʼi toj ax qʼij lu aj tok qonikʼen. Aju chmabʼil lu in nok tbʼi te Wabʼj te Qale te Jesús.

 Tej kybʼaj waʼn, etz kyqʼoj apóstol tiʼj alkyetoq mas nim toklen kyxol. Noqtzun tuʼnj, xi tqʼamaʼn Jesús kye: «Aju mas nim toklen kyxole il tiʼj tuʼn tten tmod ik tzeʼn te jun tal kʼwaʼl moqa tuʼn tten mas chʼin toklen kyxole».

Ax ikx xi tqʼamaʼn Jesús kye: «Wamiw qeye. Tuʼntzunju in xi nqʼamaʼne kyeye tkyaqilju taj Ntate tuʼn t-xi nqʼamaʼne kyeye. Chʼix tpon ambʼil tuʼn nmeltzʼaje toj kyaʼj, atz jatumel taʼ Ntate. Noqtzun tuʼnj, ax che kjel tene tzalu, ex ok kʼelel kynikʼ xjal kyiʼje qa nxnaqʼtzbʼen qeye tuʼnju kykʼujlabʼile ktel kyxole. Il tiʼj tuʼn tok kykʼujlaʼn kyibʼe ik tzeʼn weye ma che ok nkʼujlaʼne».

Tbʼajlenxi jlu, ok ten Jesús naʼl Dios tuʼn t-xi tqanin te Jehová tuʼn kyok t-xqʼuqen kykyaqil t-xnaqʼtzbʼen ex tuʼn tonin kyiʼj tuʼn kyaqʼunan junx ex toj mujbʼabʼil. Ax ikx naʼn Jesús Dios tiʼj tbʼi Jehová tuʼn tok te xjan. Yajxitl, ok ten Jesús ex qe t-apóstol bʼitzel te Jehová ex i etz. Chʼixtoq tpon ambʼil tuʼn t-xi qʼiʼn Jesús.