Cila mwaka, Ayuda yazevyanga Ucilo pa wanda walenga 14 mu mwezi wa Nisani. Cii caiusyangako vino Yeova wayakulwile umu uzya mu Ijipti nu kuyatwala umu Mpanga ya Ulayo. Mu mwaka uwa 33 C.E., Yesu na atumwa yakwe yazevizye Ucilo mu muputule wa papela mu Yelusalemu. Nupya lino yamazile ukulya, Yesu watiile: ‘Wenga pali mwemwe amamfutuka.’ Atumwa yazungwike nupya yuzizye Yesu iyati: ‘A weni wiyo kwene?’ Yesu nawe watiile: ‘U muntu wino nimapeela umukate uu.’ Lyene wapeezile Yuda Iskalyoti umukate. Papo kwene sile Yuda wafumile umu muputule.

Lyene Yesu wapefile, amokola umukate nu kupeela atumwa aalipo. Nga ayaneena ati: ‘Liini umukate uu. Ukwimililako umwili wane, uno nimapeela pa mulandu winu.’ Lyene watoozile waini apepa nu kupeela atumwa yakwe. Wayaneenyile ati: ‘Mwini waini wii. Akwimililako uwazi wane uno nimapeela pakuti imembu zinu zyelelwe. Nkumilaya ukuti mulaya aene pamwi nani ukwi yulu. Mwacita cii cila mwaka pa kunjiusya.’ Na ndakai kwene alondezi yakwe Yesu yacili yakakomenkana cila mwaka manguzi wakwe vino Yesu na alondezi yakwe yacisile pa wanda kwene uwa. Ukukomenkana kuu yakakwama ukuti Icakulya ca Manguzi Ica Mwene.

 Pa cisila ca cakulya cii, atumwa yatandike ukupazyanya pali wino wali umucindamisye. Nomba Yesu wayaneenyile ati: ‘Umuntu umukalamba sana pali mwemwe, awiyo akailola ukuti waya wa mwana umunono, aatacindama sana.

‘Mwemwe ya cuza yane. Nkamuneena vyonsi vino Tata akulonda muneene. Likwene sile indi nu kuya kuli Tata ukwi yulu. Mwemo mulatala musyale, nupya antu yalamanya ukuti mwemwe asambi yane nga yalola vino mwatemwana. Mulinzile ukulatemwana wakwe vino nani namutemwa.’

Nu mukusyalikizya, Yesu wapefile, nu kulenga Yeova ukuti acingilila asambi yakwe yonsi. Walenzile Yeova ukuti ayaazwa yaombela pamwi umu mutende. Wapefile ukuti izina lyakwe Yeova licindikwe. Lyene Yesu na asambi yakwe imvile inyimbo izya kulumbanya Yeova nupya yafumile panzi. Pa nsita iya ala yali umupiipi nu kulema Yesu.