RiJu ro rar kõm̦m̦ane Kwõjkwõjin Kijoone eo aolep iiõ ilo 14 raan ilo allõñin Nisan. Rar kõm̦m̦ane men in ñan kakeememej er kõn wãween an kar Jeova kanemkwõj er jãn aer kar rũkõm̦akoko ilo Ijipt im ãñinl̦o̦k er ñan Ãneen Kallim̦ur eo. Ke ear jejjete iiõ eo 33, Jesus im rijjilõk ro an rar kõm̦m̦ane Kwõjkwõjin Kijoone eo ilo Jerusalem ilowaan juon ruum̦ ej pãd ilõñ. Ke ej jem̦l̦o̦k aer kõjota, Jesus ear ba: ‘Juon iaami enaaj ketake eõ.’ Rijjilõk ro rar ilbõk im ba ñane: ‘Enaaj wõn?’ Jesus eba: ‘Ej armej eo me ij itõn lel̦o̦k pilawã in ñane.’ Im ear lel̦o̦k m̦õttan juon pilawã ñan Judas Iskariõt. Ilo m̦õkaj, Judas ear jutak im diwõjl̦o̦k jãn ruum̦ eo.

Innem Jesus ear jar, im kõrrãjete pilawã eo ñan elõñ m̦õttan im ajej ñan rijjilõk ro rar pãd. Ear ba: ‘Kom̦win bõk pilawã in im m̦õñã. Men in ej kõkkar kõn ãnbwinnũ, eo inaaj aje waj ñan kom̦.’ Ãlikin, ear jare wain eo im lel̦o̦k ñan rijjilõk ro an im ba: ‘Idaak wain in. Ej kõkkar kõn bõtõktõkũ, eo inaaj kato̦o̦rl̦o̦k ñan jol̦o̦k jerawiwi ko ami. Ij kallim̦ur bwe kom̦ naaj kiiñ ippa ilañ. Kom̦win kõm̦m̦ane men in kajjojo iiõ ñan keememej eõ.’ Rũkal̦oor ro an Jesus rej wõnm̦aanl̦o̦k wõt im kõm̦m̦ane men in kajjojo iiõ. Jej n̦aetan iien in Kõjota eo an Irooj.

 Ãlikin kar kõjota eo, rijjilõk ro rar akwããl kõn wõn iaaer eutiejtata. Ak Jesus ear jiroñ er im ba: ‘Eo eutiej iaami ej armej eo me ej watõk e make bwe ettãtata.

‘Kom̦ ro jera, ij ba waj ñan kom̦ aolep men ko Jema ekõn̦aan bwe in ba ñan kom̦. M̦õttan jidik inaaj likũt kom̦ im ilo̦k ñan ippãn Jema ilañ. Armej renaaj jel̦ã bwe kom̦ij rũkal̦oora kõn ami yokwe doon. Kom̦ij aikuj yokwe doon ãinwõt aõ kar yokwe kom̦.’

Ãliktata, Jesus ear jar im kajjitõk bwe Jeova en kõjparok aolep rũkal̦oor ro an im bwe en jipañ er jel̦ã jerbal ippãn doon ilo aenõm̦m̦an. Ear bar jar bwe en kwõjarjar ãt eo etan Jeova. L̦ak m̦õj, Jesus im rijjilõk ro an rar al im nõbar Jeova, innem rar diwõjl̦o̦k ñan nabõj. Ilo tõre in, ear epaaktok iien eo bwe ren jibwe im kalbuuji Jesus.