Nopa judíos kichiuayayaj sejse xiuitl nopa iljuitl Pascua ipan tonali 14, metstli nisán. Kiampa kiilnamikiyayaj Jehová kinkixtijtoya tlen Egipto uan kinuikatoya ipan nopa tlali tlen kiniljuijtoya kinmakas. Ipan xiuitl 33, Jesús uan iapóstoles kichijkej nopa Pascua uejkapa ipan se ueyi kali ipan Jerusalén. Kema tlankej tlakuaj, Jesús kiijtok: “Se tlen inmojuantij nechtemaktilis”. Nopa apóstoles momajmatijkej uan kitlajtlanijkej: “¿Ajkia mitstemaktilis?”. Jesús kinnankilik: “Katli nijmakas ni achi pantsi”. Uajka kimakak se kentsi pantsi Judas Iscariote. Teipa Judas moketstikiski uan kistejki.

Teipa Jesús kichijki se tlamaijtoli, kitlajkotlapanki nopa pantsi uan kinmajmakak iapóstoles katli mokajtoyaj iuaya. Kiniljuik: “Xijkuakaj ni pantsi, tlen kiixnextia notlakayo tlen nitemaktilis inmopampa”. Teipa, sampa kichijki se tlamaijtoli uan kinpanoltilik nopa vino, uan kiniljuik: “Xikikaj ni vino. Ni kiixnextia noeso tlen nijtoyauas uan kiampa toTeotsij inmechtlapojpoljuis. Niinmechiljuia, inmojuantij intlanauatisej nouaya ne iluikak. Sejse xiuitl xijchiuakaj ni, uan kiampa inkinextisej innechilnamikij”. Cristo itokilijkauaj nojua mosentiliaj sejse xiuitl ipan nopa tonali uan kichiuaj kema kalaktojka tonati. Nopa kitokaxtiaj toTeko iTlakualis.

 Teipa, kema ya tlakuajtoyaj, nopa apóstoles pejkej mokualaniaj pampa kinekiyayaj kimatisej ajkia tlen inijuantij tlayakanayaya. Uan Jesús kiniljuik: “Katli kineki tlayakanas, achtoui moneki amo moueyimatis uan kintekipanos sekinok”.

Jesús nojkia kiniljuik: “Inmojuantij innouampoyouaj. Yeka niinmechiljuia nochi tlen noTata kineki ma niinmechiljui. Nechka nias iluikak kampa itstok noTata. Uan inmojuantij nikaj inmokauasej, uan maseualmej kimatisej nelnelia innechtokiliaj tlaj inkinextisej inmoikneliaj. Moneki inmoiknelisej kej na niinmechiknelijtok”.

Teipa, Jesús momaijtok uan kitlajtlanik Jehová ma kinmokuitlaui nochi itokilijkauaj uan ma kinpaleui kitekipanosej sansejko uan ika tlaseuilistli. Nojkia kitlajtlanik ma moueyichiua itoka. Teipa, Jesús uan iapóstoles uikakej uan kistejkej. Jesús nechka kiitskiskiaj.