THUTO 87
Selalelo sa Jesu sa Mafelelo
Ngwaga o mongwe le o mongwe ka di-14 tša kgwedi ya Nisani, Bajuda ba be ba keteka monyanya wa Paseka. Monyanya woo o be o ba gopotša kamoo Jehofa a ilego a ba lokolla ka gona bokgobeng kua Egipita gomme a ba iša Nageng ya Kholofetšo. Ka ngwaga wa bo-33, Jesu le baapostola ba gagwe ba ile ba keteka monyanya woo wa Paseka ka phapošing ya ka godimo kua Jerusalema. Ge ba feditše go ja, Jesu o ile a re: ‘Yo mongwe wa lena o tlo nthekiša.’ Baapostola ba makala kudu, gomme ba re go Jesu: ‘Ke mang yena yoo?’ Jesu a re: ‘Ke tlo rekišwa ke monna yo ke tlago go mo nea senkgwa se.’ Ke moka Jesu a nea Judase Isikariote senkgwa seo. Gateetee Judase a emelela a tšwa ka phapošing yeo.
Ka morago ga gore Judase a tšwe ka phapošing yeo, Jesu o ile a rapela, a ngwathaganya senkgwa gomme a se nea baapostola ba gagwe bao a bego a šetše le bona. A re go bona: ‘Tšeang senkgwa se le se je. Se swantšhetša mmele wa ka, woo ke tlago go neelana ka wona ka baka la lena.’ Ke moka a rapelela le beine, gomme a e nea baapostola ba gagwe, a re: ‘Enwang beine ye. E swantšhetša madi a ka ao a tlago go tšhollwa e le gore dibe tša batho ba bantši di lebalelwe. Ke le tshepiša gore le tlo ba dikgoši le nna kua legodimong. Le dire se ngwaga o mongwe le o mongwe e le go nkgopola.’ Ngwaga o mongwe le o mongwe mantšiboeng a di-14 tša kgwedi ya Nisani, balatedi ba Jesu ba a kopana gore ba gopole seo Jesu a ba diretšego sona. Ga bjale seboka seo se bitšwa Selalelo sa Morena.
Ka morago ga selalelo, baapostola ba ile ba ngangišana ka gore ke mang yo mogolo gare ga bona. Eupša Jesu a re go bona: ‘Yo mogolo go lena ke yo a itebelelago e le yo monyenyane gare ga lena, e bile a ipona a sa phale ba bangwe.
‘Lena le bagwera ba ka. E bile ke le botša dilo ka moka tšeo Tate a nyakago ke le botša tšona. Kgauswinyane ke tlo boela go Tate wa ka legodimong. Lena le tlo šala mo lefaseng, gomme batho ba tlo tseba gore le barutiwa ba ka ge ba bona le ratana. Le swanetše go ratana go etša ge ke le ratile.’
Mafelelong a selalelo, Jesu o ile a rapela gomme a kgopela Jehofa gore a šireletše barutiwa ba gagwe ka moka. O ile a kgopela Jehofa gore a thuše barutiwa ba gagwe gore ba šomišane gabotse. O ile a rapelela gore leina la Jehofa le kgethagatšwe. Ka morago ga thapelo, Jesu le baapostola ba gagwe ba ile ba tumiša Jehofa ka go mo opelela gomme ba tloga. Go be go fihlile nako ya gore Jesu a swarwe ke manaba a gagwe.
“Se boife, wena mohlatswana, gobane Tatago lena o kgahlilwe ke go le nea Mmušo.”—Luka 12:32
You May Also Like
JESU—TSELA, THEREŠO LE BOPHELO
Selalelo sa Morena
Jesu o hloma segopotšo seo balatedi ba gagwe ba swanetšego go se swara ngwaga le ngwaga ka Nisani 14.
JESU—TSELA, THEREŠO LE BOPHELO
O Ruta Thuto ya Boikokobetšo Pasekeng ya Mafelelo
O makatša baapostola ka go dira modiro wa mohlanka.
JESU—TSELA, THEREŠO LE BOPHELO
Thapelo ya Jesu ya go Phetha a le Phapošing ya ka Godimo
O bontšha ka mo go kwagalago gore o fihleletše selo seo se lego bohlokwa kudu go feta go fo nea batho phološo.
DIPOTŠIŠO TŠEO DI BOTŠIŠWAGO KUDU
Go Reng Dihlatse tša Jehofa di Swara Selalelo sa Morena go Fapana le Dikereke tše Dingwe?
E bile se bitšwa gape gore ke Selalelo sa Mafelelo goba Segopotšo sa Lehu la Kriste, ye ke tiragalo e kgethwa ya Dihlatse tša Jehofa. Hlokomela seo Beibele e se bolelago ka tiragalo ye.
