Nisan yiził 14 yoołkááł góneʼ tʼáá nináháhááh bikʼeh Jew dineʼé Passover ánídayiilʼįįh. Ííjipdi naalteʼ dajílı̨́ı̨́dę́ę́ʼ chʼééjíkaigo kéyah haa deetʼánę́ęjįʼ jíníná, éí béédajilniih doo biniyé ánídaʼjiilʼįįh. 33 C.E. yihahgo, Jesus dóó daalʼaadii éí Passover bééhániih biniyé Jerúsalemdi ahíikai. Daʼjííyą́ą́ʼdóó bikʼijįʼ, Jesus ádííniid: ‘Nihí łaʼ shikʼijįʼ doołeeł.’ Daalʼaadii tʼóó yikʼee dadeesyizgo, Jesus ádeiłní: ‘Háíshąʼ?’ Jesus ádííniid: ‘Díí bááh baa deeshʼáłígíí éí átʼı̨́.’ Áko Jesus Júdas Iskáriyat bááh yeiníʼą́. Tʼáá akǫ́ǫ́ Júdas chʼélwod.

Jesus bááh néidiiʼą́ągo yikʼi sodoolzin áádóó néiiyiiztʼiʼ. Daalʼaadii yitaizniiʼgo áyidííniid: ‘Díí bááh daahsą́. Éí shitsʼíís nihá ninádideeshʼáłígíí átʼé.’ Nááʼákóneʼ wáin néidiiką́ągo yikʼi sodoolzin. Kóní: ‘Díí wáin daohdlą́, háálá díí shidił bąąhígi átʼéii yóóʼahiditʼaah biniyé deeznáʼígíí átʼé. Yáʼąąshdi shíighahdóó naatʼáanii dadoołeeł. Tʼáá nináháhááh kótʼéego shéédaałniih doo.’ Tʼáá nináháhááh bikʼeh Jesus yikééʼ deiyíkáhígíí kótʼéego ánídaʼiilʼįįh. Éí Jesus Akéeʼdi Bił Daʼjííyą́ą́ʼ bee wójí.

Daʼjííyą́ą́ʼ bikʼijįʼ, daalʼaadii éí shíyeeʼ aláahdi ánishtʼé daaníigo saad dahółǫ́. Jesus áháłní: ‘Háíshı̨́ı̨́ akéeʼdi naagháago índa  aʼohgo ádaa nitsíkeesígíí éí ayóó átʼé dooleeł.

‘Nihí éí shikʼis danohłı̨́. Shizhéʼé yee shił halneʼígíí nihił béédahózin doo nihóʼní, áko éí bee nihił hashneʼ. Tʼáadoo hodíínááʼí yáʼąąshgóó shizhéʼé bichʼįʼ nídésdzá. Nihí éí tʼáá kǫ́ǫ́ doo. Ayóóʼánihííníshʼnínígi átʼéego ayóóʼádaʼahíínóhʼní, áko daalʼaadii danohłı̨́įgi diné tʼáá ałtso bił béédahózin doo.ʼ

Áadi índa, Jesus éí daalʼaadii baa áhólyą́ dóó bíká anánílwoʼ, áko kʼé daʼahidiʼníigo ahił nidaalnish doo níigo Jiihóvah yichʼįʼ sodoolzin. Jiihóvah bízhiʼ dólzin dooleeł ałdóʼ yiniyé sodoolzin. Jiihóvah baa haʼniihgo sin bee dahojitaałgo tłʼóóʼgóó chʼíjíkai. Jesus éí kʼadę́ę arrest ábiʼdilnééh.