Mehn Suhs kan kin kasarawih Pahsohpao sounpar koaros ni kaeisek pahieun rahn ni sounpwong en Nisan. Met kin katamankihong irail duwen Siohwa eh ketin kapitirailla sang kalidu nan Isip oh wairaildohng nan Sapwen Inowo. Nan pahr 33, Sises oh sapwellime wahnpoaron ko kasarawih Pahsohpao nan ehu pere powe nan Serusalem. Ni kaimwiseklahn sak en Pahsohpao, Sises mahsanihong irail: ‘Emen nanpwungamwail pahn pangiehla.’ Wahnpoaron ko pwuriamweila oh idek rehn Sises: ‘Maing, ihs mwo?’ Sises eri mahsanih: ‘Iei ohl me I pahn kihong ih pilawa wet.’ Ih eri ketikihong Sudas Iskariot lepin pilawao. Ni ahnsowohte, Sudas ahpw uhda oh kohkohlahsang nan pereo.

Sises eri ketin kapakap oh pilitikihpeseng pilawao oh ketikihong wahnpoaron ko me mihmihte wasao. E mahsanih: ‘Kumwail kang pilawa wet. Met kin wiliandi paliwerei, me I pahn ketikihda ong kumwail.’ Ih eri pil ketin kapakapki waino oh ketikihong sapwellime wahnpoaron ko. E mahsanih: ‘Kumwail nim wain wet. E kin wiliandi ntahi, me I pahn ketikihda pwehn mie mahkpen dihp. I inoukihda me kumwail pahn iang ie wia nanmwarki kei nanleng. Kumwail wia met nan pahr koaros pwehn tamataman ie.’ Sapwellimen Sises tohnpadahk kan kin pokonpenehte ni soutik en Nisan eisek pahieu nan pahr koaros. Met pokonpene wet uhd adaneki Sak en Soutik en Kauno.

 Mwurin sak en soutiko, wahnpoaron ko akamaikihda ihs me keieu kesempwal nanpwungarail. Ahpw Sises mahsanihong irail: ‘Emen me keieu lapalap nanpwungamwail iei ih me kin wiahki pein ih me keieu tikitik, me keieu sohte kesempwal.

‘Kumwail kompoakepahi kei. I padahkihong kumwail soahng koaros me Semeio kupwurki ien padahkihong kumwail. Ahnsou keren I pahn pwuradalahng rehn Semeio nanleng. Kumwail pahn mihmihte, oh aramas akan pahn ese me kumwail nei tohnpadahk sang ni limpoak me kumwail kin kasalepene nanpwungamwail. Kumwail anahne poakohng emenemen duwehte ei poakohng kumwail.’

Ni imwilah, Sises ketin kapakap, peki rehn Siohwa en ketin pere sapwellime tohnpadahk kan koaros. E ketin peki rehn Siohwa en ketin sewese irail ren doadoahkpene ni popohl. E ketin kapakapki mwaren Siohwa en sarawihla. Sises oh sapwellime wahnpoaron ko eri koulki koul en kaping kan ong Siohwa oh kohieila likio. E kereniongehr ahnsou me Sises pahn selidi.