Judiocunaca tucui huatacunami 14 de nisán quillapi Pascuata yuyarijcuna carca. Egipto llajtamanta Jehová Dios llujshichishcata, pai cusha nishca Allpaman pushashcatapish yuyaringapajmi Pascua fiestata rurajcuna carca. Cutin 33 huatapica Jerusalenpimi shuj huasi jahua pisopi Jesuspish apostolcunapish Pascuata yuyarircacuna. Ña tucuchicushpami Jesusca, ‘cancunamantaca shujmi ñucata huañuchichun entreganga’ nirca. Chaimi apostolcunaca, ‘¿pitaj paica?’ nircacuna. Jesusca, ‘tandata ñuca pimanmi cuni, paimi can’ nircami. Qꞌuipaca Judas Iscariotemanmi tandata curca. Judasca chai ratomi llujshishcahuan rirca.

Qꞌuipaca Jesusca Diosta pagui nishpami paihuan saquirij apostolcunamanca tandata chaupishpa curca. Paicunataca, ‘micuichij, caica ñuca cuerpotami ricuchin. Caitami cancunamanca cusha’ nircami. Copata japishpapish Diosta pagui nishpami, ‘cai copamanta ubyaichij, achcacunapaj juchacunata perdonangapaj ñuca yahuartami ricuchin. Cancunami ñucahuan jahua pachapi mandanguichij. Tucui huatacunami caita rurashpa catina canguichij’ nirca. Jesusta catijcunaca pai huañushcata yuyaringapajmi, ña tutayagrijpi chai fechallapitaj tandanacunchij. Chai tandanacuitaca  Jesús huañushcata yuyarina tandanacui nishpami shutichinchij.

Chai qꞌuipaca apostolcunaca, ‘¿maijanshi tucuita yalli jatun nishcaca canchij?’ nishpami litunacucurcacuna. Chaimi Jesusca, ‘cancunapurapi maijan jatun nishca cajca, qꞌuipa huiñai shinallami cana canguichij’ nirca.

Shinallataj Jesusca, ‘ñuca amigocunami canguichij, chaimantami ñuca Yaya imalla nishcataca tucuita huillarcani. Ñallami ñuca Yayapajman risha. Cancunaca caipimi saquiringuichij. Ima shinami cancunata cꞌuyarcani, chashnallataj cancunapish caishuj chaishuj cꞌuyanacujpimi ñucata alli catijcuna cashcata yachangacuna’ nircami.

Ña tucuchicushpaca Jesusca paita catijcunata cuidachun, shuj shinalla sumajta causachunmi Jehová Diosta mañarca. Diospaj shutipish alli nishca cachunmi mañarca. Qꞌuipaca Jesuspish apostolcunapish Jehová Diosta cantashca huashaca rircacunami. Contracuna Jesusta japichunca ña asha horascunallami illarca.