Judiokunam Egipto nacionmanta librasqa kasqankuta yuyarispa, sapa wata 14 nisan killapa punchawninpi pascua fiestata ruwaqku. Chaymi 33 watapipas Jesuswan apostolninkuna Jerusalenpi kaq wasipa altosninpi pascua fiestata ruwarqaku. Mikuyta tukuruptinkum Jesus nirqa: “Huknikichikmi qipanchawankichik”, nispa. Chaymi apostolninkunaqa mancharikuspanku Jesusta tapurqaku: “¿Mayqanniykutaq?”, nispa. Hinaptinmi Jesus nirqa: “Tanta qusqayta chaskikuqmi”, nispa. Chaynata niykuspanmi Judasman haywaykurqa tantata. Judasñataqmi hatarispan pasakurqa.

Hinaspam Jesusqa taytanta mañakuykuspan tantata partiykurqa, hinaspanmi apostolninkunaman quykuspa nirqa: “Mikuychik, kay tantaqa tupan qamkunarayku qunay cuerpoywanmi”, nispa. Vinota tomanankupaqpas kaqmantam taytanta mañakurqa, hinaspam nirqa: “Kay vinota tomaychik, kayqa tupan huchaykichikrayku chaqchusqa yawarniywanmi. Kaynatam sapa wata ruwankichik. Chaymantapas nikichikmi: ‘Hanaq pachapim ñuqawan kamachiq kankichik’”, nispa. Chaymi Jesuspa qatiqninkunaqa sapa wata inti siqaykuyta huñunakunku Jesuspa wañukusqanta yuyarinankupaq.

 Mikuyta tukuruspallankum apostolkunaqa atipanakurqaku mayqanninku aswan riqsisqa kasqankumanta, chaymi Jesusqa nirqa: “Pipas riqsisqa kayta munaqqa llapallanpa sullkan hinam kanan”, nispa.

Jesusqa nirqaraqmi: “Qamkunaqa kuyasqaymi kankichik, chaymi taytaypa niwasqankunata willaykichik. Ñam kutisaqña taytayman, qamkunaqa kaypiraqmi kankichik. Runakunapas kuyanakusqaykichikta qawaspankum yachanqaku ñuqapa qatiqniykuna kasqaykichikta. Chaymi kuyasqayman hina kuyanakunaykichik”, nispa.

Huñunakuy tukuruptinñataqmi Jesusqa taytanta mañakurqa qatiqninkunata yanapananpaq. Mañakurqataqmi taytanpa sutin chuyanchasqa kananpaqpas. Chaymantam Jesusqa apostolninkunawan Jehova Diospaq takiruspanku lluqsirurqaku. Manapas unaymantam Jesusta presocharurqaku.