Кажно бэрш, андо 14 дес андо шон нисано, иудеёря стонас и патради. Андэ кадэва празднико вонэ сэрэнас пала кода, сар о Иегова виандярдя лэн анда египетско рабство и андя лэн андэ ԥув, пала сави во дя алав, кай авэла лэндири. Андо 33 бэрш лэ И. Х. о Иисусо и лэстирэ апостолоря стидэпэ андэ ек цэр андэ упруни комната, андо Иерусалимо, кай тэ стон о празднико и патради. Сар вонэ дохалэ о Иисусо ԥэндя: «Ек андар тумэндэ придэла ман». И апостолоря динэ наздив и пушлэ: «И ко када?» О Иисусо ԥэндя: «Кодэва, касти мэ дава кадэва марно». Тоди во процырдя кадэва марно кодэлэсти, кас ақарэнас Иуда Искариото. О Иуда сразу же ущеля и вижыля анда цэр.

После када о Иисусо мангляпэ и росԥагля о марно пэ котора, дя лэс лэ апостолонэнди и ԥэндя: «Хан кадэва марно. Во сыкавэл мэрни тила, сави мэ отдава пала тумэндэ». Тоди во ля о вино, мангляпэ и дя лэнди. Во ԥэндя: «Пэн кадэва вино. Во сыкавэл мэрно рат, саво питяла, кай тэ простинпэ тумарэ ӷрехоря. Мэ дав алав, кай тумэ авэна манца тэ правин по нэбо. Терэн кадэва празднико кажно бэрш, кай тэ сэрэн пала мандэ». Кодэла, ко жылэ пала Иисусо, и доси кажно бэрш стидэнпэ андэ кадэва вэчэро. Пэ када ԥэнэн, Вэчэро, кай тэ вспоминают лэ Иисусостири смэрть.

 После кода, сар вонэ дохалэ и апостолоря линэ тэ споринпэ, ко андар лэндэ май баро. Но о Иисусо ԥэндя: «Само баро кодэва, саво гиндой пала пэстэ, кай во май цыкно аврэндар и на стол пэс, кай во май баро аврэндар».

О Иисусо ԥэндя: «Тумэ мэрнэ друӷоря. Мэ росԥэнав тумэнди вся, со камэлас тумэнди тэ пэрэдэл мэрно Дад. Йто мэ ваздавапэ по нэбо каринг лэстэ. Ай тумэ ашэнапэ катэ, и мануша уӷанэна, кай тумэ мэрнэ ученикоря, сар тумэ лэна тэ любин ек еқэс. Тумэ трэбуй тэ любин ек еқэс кадя, сар мэ любисарав тумэн».

После када о Иисусо мангляпэ и мангля, кай о Иегова тэ фэрий всаворэ лэстирэ учениконэн. Во кадяжэ мангляпэ, кай о Иегова тэ поможый, кай тэ на парашэн тэ авэн ек пала. О Иисусо мангэласпэ, кай лэ Иеговаско алав тэ авэл свынто. О Иисусо и лэстирэ апостолоря дилаблэ диля, савэ славин лэ Иеговас, и после када вонэ вижылэ анда цэр. Йто лэ Иисусос трэбуй сас тэ залэн, кай тэ сындон.