LESONA 87
Talisuaga Mulimuli a Iesu
Na faamanatuina e tagata Iutaia le Paseka i tausaga taʻitasi i le aso 14 o le masina o Nisani. Na faamanatu atu ai iā i latou le auala na faasaʻolotoina ai i latou mai i le nofo pologa i Aikupito, ma taʻitaʻia atu ai i le Nuu Folafolaina. I le 33 T.A., na faamanatuina ai e Iesu ma ona aposetolo le Paseka i se potu pito i luga o se fale i Ierusalema. Ina ua māeʻa le taumafataga, na fetalai atu Iesu: “E iai se tasi o outou e na te faalataina aʻu.” Na faateʻia le ʻauaposetolo ma fesili atu iā Iesu: ʻO ai?’ Na tali mai Iesu: ʻO lē o le a ou avatu i ai lenei falaoa.’ Ona ia avatu lea o le falaoa iā Iuta le Sekara. O le taimi lava lenā na tū ai i luga Iuta ma alu ese mai le potu.
Ona faia lea e Iesu o se tatalo, ua vaevae falaoa ma avatu i ona aposetolo o loo totoe. Na ia faapea atu: ʻIa outou aai i lenei falaoa. O le faatusa lea o loʻu tino.’ Ona ia faia lea o se tatalo mo le uaina, ma avatu i ona aposetolo. Na ia faapea atu: ʻIa outou inu i lenei uaina. O le faatusa lea o loʻu toto, lea o le a faamagaloina ai agasala. Ou te folafola atu o le a avea outou ma tupu faatasi ma aʻu i le lagi. Ia faia lenei mea i tausaga uma ina ia manatua ai aʻu.’ O loo faaauau pea ona faapotopoto faatasi soo o Iesu i lenā afiafi i tausaga taʻitasi. Ua taʻua lenā sauniga i aso nei o le Talisuaga Afiafi a le Alii.
Ina ua māeʻa lenā talisuaga, ona finau lea o aposetolo po o ai o i latou e sili. Ae na faapea atu Iesu: ʻO lē sili iā te outou, e tatau ona manatu iā te ia o sē aupito itiiti pe faatauvaa.
ʻO outou o aʻu uō. Ou te taʻuina atu mea uma e finagalo loʻu Tamā e faailoa atu iā te outou. Ua toeitiiti ona ou alu lea i loʻu Tamā i le lagi. O le a tuua na o outou, ma o le a iloa e tagata o oʻu soo outou ona o lo outou alolofa o le tasi i le isi. E tatau ona alofa le tasi i le isi e pei ona ou alofa iā te outou.’
Mulimuli ane, ona tatalo lea o Iesu iā Ieova e puipui ona soo uma. Na ia talosaga iā Ieova e fesoasoani iā i latou e galulue faatasi ma le filemu. Na ia tatalo ina ia faapaiaina le suafa o Ieova. Ona usuina lea e Iesu ma ona aposetolo o viiga iā Ieova ma ō i fafo mai i le fale. Ua lata i le taimi e puʻea ai Iesu.
“Aua le fefefe le lafu mamoe itiiti e, auā ua finagalo malie lo outou Tamā e tuuina atu le malo iā te outou.”—Luka 12:32
E te Ono Fiafia Foʻi
IESU—LE ALA, LE UPU MONI MA LE OLA
Le Talisuaga Afiafi a le Alii
Ua faavaeina e Iesu se sauniga e tatau i ona soo ona faamanatuina i tausaga taʻitasi iā Nisani 14.
IESU—LE ALA, LE UPU MONI MA LE OLA
Aʻoaʻo Atu e Faatatau i le Lotomaulalo i le Paseka Mulimuli
Ua faateʻia le ʻauaposetolo ina ua faatinoina e Iesu le galuega e faia e se pologa.
IESU—LE ALA, LE UPU MONI MA LE OLA
Le Tatalo Faaiʻu a Iesu i le Potu i Luga
Ua faamanino atu e Iesu ua ia faataunuuina se mea e sili atu ona tāua nai lo o le aumaia o le faaolataga mo tagata.
FESILI E MASANI ONA LĀGĀ
Aiseā e Ese ai le Auala e Faamanatu ai e Molimau a Ieova le Talisuaga a le Alii Mai i Isi Lotu?
Ua taʻua foʻi o le Talisuaga Mulimuli po o le Faamanatuga o le Maliu o Keriso, ma o le sauniga e sili ona tāua mo Molimau a Ieova. Seʻi iloilo le faamatalaga a le Tusi Paia e faatatau i lea sauniga.
