EmaJuda abegubha umkhosi weliPhasika njalo ngemnyaka, ngenyanga yaNisan 14. Loku bekuwakhumbuta kutsi Jehova abewakhulule njani ekugcilatweni eGibhithe aze ayofika eVeni Lesetsembiso. Ngemnyaka wa-33 C.E., Jesu nebaphostoli bakhe bagubha umkhosi weliPhasika basekamelweni lelisetulu eJerusalema. Nabasadla, Jesu watsi: ‘Lomunye wenu utangitsengisa.’ Baphostoli bamangala, base babuta Jesu batsi: ‘Ngubani?’ Jesu watsi: ‘Lona lengitamnika sinkhwa nguye lotangitsengisa.’ Ngako wabese utsatsa lucetu lwesinkhwa walunika Judasi Skariyothi. Ngekushesha Judasi wasukuma wabashiya.

Jesu wase uyathantaza, watsatsa sinkhwa wasihlephula, wase usinika baphostoli bakhe. Watsi: ‘Dlanini lesinkhwa. Simelela umtimba wami lengitawunikela ngenca yenu.’ Wase uthantazela neliwayini, wabese ulinika baphostoli bakhe. Watsi: ‘Natsani leliwayini. Limelela ingati yami, letawucitseka kuze kutsetselelwe tono. Ngiyanetsembisa kutsi nitawubusa kanye nami ezulwini. Kwenteni minyaka yonkhe loku, ningikhumbule.’ Balandzeli baJesu bayachubeka bakhumbula kufa kwakhe minyaka yonkhe. Lomkhosi weliPhasika nyalo sewubitwa ngekutsi Sidlo SeNkhosi Sakusihlwa.

 Ngemuva kwaleliPhasika, baphostoli besebaphikisana kutsi ngubani lomkhulu emkhatsini wabo. Kodvwa Jesu watsi kubo: ‘Lomkhulu emkhatsini wenu kufanele abe njengalomncane kunani nonkhe.’

‘Nibangani bami. Nginitjela konkhe loko Babe wami lafuna nginitjele kona. Sekudvutane kutsi ngibuyele kuBabe ezulwini. Ngitanishiya, futsi bantfu batawati kutsi nibafundzi bami nangabe nitsandzana. Kufanele nitsandzane njengobe nami nginitsandzile.’

Ekugcineni, Jesu wathantaza acela Jehova kutsi anakekele bafundzi bakhe. Wacela Jehova kutsi abasite basebente ndzawonye ngekuthula. Wathantazela kutsi ligama laJehova lingcweliswe. Jesu nebafundzi bakhe babese bahlabela tingoma badvumisa Jehova base bayaphuma. Besesisondzele sikhatsi sekutsi Jesu aboshwe.