Sabang taung, tau Yahudi měkẹ̌koạ Paskah su ěllo kapul᷊o ěpạe su wul᷊ang Nisan. Acara ini makakoạ si sire mẹ̌tahěndung Yehuwa seng napakawebasẹ̌ si sire bọu pẹ̌tatahuělang su Misire, kụ nẹ̌bawa si sire sarang Ěntanang Pẹ̌dariandi. Su taung 33 M, Yesus dingangu manga rasule někoạ Paskah su ruangan bageang dasị su sěmbaụ bal᷊e su Yerusalem. Su apang bọu kimang, Yesus nẹ̌bera, ’Sěngkatau bọu i kamene sarung tawe masatia si siạ.’ Manga rasule himěkosẹ̌ kụ nẹ̌kiwal᷊o, ’I sai i sie?’ Yesus simimbahẹ̌, ’I sie kai tau takụ gělịkang borotẹ̌ ini.’ Bọu ene i sie něgělị borotẹ̌ sěmpotọ si Yudas Iskariot. Yudas apidu dimarisị kụ siměbang.

Bọu ene i Yesus nẹ̌doa, něngempang borotẹ̌, kụ němahiạ su manga rasule apang ene sene. I sie nẹ̌bera, ’Kaěngke borotẹ̌ ini. Borotẹ̌ ini nělahẹ badangku, kụ sarung takụ gělịkang gunang i kamene.’ Bọu ene i sie saụ nẹ̌doa, kụ něgělị anggorẹ̌ ene su manga rasule. I sie nẹ̌bera, ’Inungke anggorẹ̌ ini. Anggorẹ̌ ini nělahẹ dahaku, sarung takụ gělịkang tadeạu dosang taumata botonge ampungang. Iạ mẹ̌diandi, i kamene sarung makoạ datu dingangku su sorga. Sabang taung, koạko acara kere ini gunang mẹ̌tahěndung si siạ.’ Sarang orasẹ̌ ini, manga tumatol᷊eng i Yesus měkẹ̌koạ acara kerene sabang taung  su tanggalẹ̌ 14 Nisan. Acara ene orasẹ̌ ini nisěbạ Hěbing Perjamuan Tuang.

Bọu ene, manga rasulẹ̌ nẹ̌darendehẹ̌ soal u i sai limembong penting su tal᷊oarang i sire. Katewe Yesus nẹ̌bera, ’I saing kaguwạkenge su tal᷊oarang i kamene ene kai taumata apang nẹ̌pěndang i sie tawe penting.

’I kamene kai hapịku. Iạ maul᷊ị si kamene kěbị apa niul᷊ị i Amangku si siạ. Seng mal᷊ighạ iạ mapul᷊ẹ sarang anung Amangku su sorga. I kamene sarung tatapẹ̌ sini, kụ taumata sarung makasingkạ i kamene kai muritẹ̌ku mạeng i kamene kuměndagẹ̌ sěmbaụ su wal᷊inẹ. I kamene harusẹ̌ mẹ̌kakěndagẹ̌ sěmbaụ su wal᷊inẹ, kere iạ seng kiměndagẹ̌ si kamene.’

Samurine, i Yesus nẹ̌doa tadeạu Yehuwa měndiagạ kěbị murite. I sie nẹ̌dorong tadeạu Yehuwa mẹ̌tul᷊ung si sire měhal᷊ẹ̌ sěngkasio su pẹ̌darame. I sie nẹ̌doa tadeạu areng i Yehuwa ipakasusi. Bọu ene, Yesus dingangu manga murite nẹ̌kantarị nẹ̌dalo si Yehuwa kụ siměbang. Seng mal᷊ighạ tempone i Yesus sarung samekang.