Tinan-tinan, ema Judeu sira selebra Páskua iha loron 14 Nisan. Selebrasaun neʼe fó-hanoin sira katak Jeová halo sira livre husi moris nuʼudar atan iha rai-Ejitu no lori ba Rai neʼebé Maromak Promete. Iha tinan 33 EC, Jesus no apóstolu sira selebra Páskua iha kuartu ida iha andár leten iha Jeruzalein. Depois han hotu, Jesus dehan: ‘Imi ida sei entrega haʼu ba inimigu nia liman.’ Apóstolu sira hakfodak, no sira husu: ‘Ema neʼe sé?’ Jesus hatán: ‘Nia mak ema neʼebé haʼu sei fó paun.’ Tuirmai nia fó paun ba Judas Iscariotes. Judas hamriik no laʼo sai.

Tuirmai Jesus halo orasaun, silu paun, no fó ba apóstolu sira. Nia dehan: ‘Han paun neʼe. Neʼe reprezenta haʼu-nia isin neʼebé haʼu sei fó ba imi-nia diʼak.’ Tuirmai Jesus halo orasaun kona-ba tua-uvas, fó ba apóstolu sira, no dehan: ‘Hemu tua neʼe. Neʼe reprezenta haʼu-nia raan neʼebé haʼu sei fó atu kasu ema nia sala. Haʼu promete katak imi sei ukun nuʼudar liurai hamutuk ho haʼu iha lalehan. Kontinua halo ida-neʼe tinan-tinan hodi hanoin haʼu.’ Toʼo agora Jesus nia dixípulu sira halibur tinan-tinan atu selebra han-kalan neʼe. Ohin loron ita bolu reuniaun neʼe Naʼi nia Han-Kalan.

 Tuirmai, apóstolu sira haksesuk malu makaʼas kona-ba sé mak boot liu entre sira. Maibé Jesus dehan: ‘Ema neʼebé boot liu iha imi-nia leet mak ema neʼebé haree ninia an kiʼik liu no ladún importante.

‘Imi mak haʼu-nia belun. Haʼu fó-hatene buat hotu neʼebé Aman haruka haʼu atu hatoʼo ba imi. Lakleur tan haʼu sei fila fali ba Aman iha lalehan. Imi sei nafatin iha neʼe no ema sei hatene katak imi mak haʼu-nia dixípulu se imi hadomi malu. Imi tenke hadomi malu hanesan haʼu hadomi imi.’

Ikusliu, Jesus harohan ba Jeová atu proteje ninia dixípulu sira no atu sira bele serbisu hamutuk ho unidade. Nia mós halo orasaun atu Maromak nia naran sai santu. Tuirmai Jesus no apóstolu sira kanta knananuk hahiʼi nian ba Jeová no sai ba liʼur. Tempu besik ona atu ema kaer Jesus.