ITYOUGH 87
Yesu Ya Paseka Na u Masetyô
Hanma inyom cii, yange uwer u Nisan ua nyôron ayange 14 yô, Mbayuda ve ember iniongo i Paseka sha iyange la jigh jigh. Ve er iniongo ne sha u umbur er Yehova yange due a ve ken Igipiti, ape ve lu ikpan la, va a ve ken Tar u Ityendezwa la yô. Nahan ken inyom i 33 la, mba nguren eren Paseka yô, Yesu man mbaapostoli nav za ya kwaghyan u iniongo shon sha iyou i sha aôndo igen, ken Yerusalem. Mba ye kwaghyan la mba been yô, Yesu kaa a ve ér: ‘Or môm ken a ven nana va tôôm nana tee.’ Nahan ishima ta mbaapostoli kwe, ve gba pinen Yesu ér: ‘Ka ana?’ Yesu kaa a ve ér: ‘Ka or u me coon bredi me na nan la.’ Yesu maa coon bredi na Yuda Isekarioti. Maa Yuda mough fese due ken iyou la kera.
Tsô Yesu er msen, maa coon bredi haa shin ikya, tôô na mbaapostoli nav mba ve shi her la. Maa a kaa ér: ‘Ya nen bredi ne. A tile sha ityough ki iyol yam, i me na sha ci wen yô.’ A shi a haa wain shin kôôpu, a er msen sha mi, a gema a mi a na mbaapostoli nav. A kaa ér: ‘Ma nen wain ne. A tile sha ityough ki awambe a am, a me na sha ci u i de ior asorabo yô. M ngu tôndon zwa a ven mer, ne va yem sha, ne za tema tor a mo imôngo. Eren nen kwagh ne hanma inyom, sha u umbur mo.’ Hegen kpa, mbadondon Yesu ka ve er mkombo sha iyange ne aikighe, ken hanma inyom. Nyian ne ka i yila mkombo ne ér, Kwaghyan u Umbur Ter.
Mba ye kwaghyan la mba been yô, mbahenen mba Yesu mba ve shi mbara, gba ayôôso sha kwagh u or u nana lu orvesen ve yô. Kpa Yesu kaa a ve ér: ‘Or u nana lu orvesen wen yô, ka or u nan nengen iyol i nan ér nan hemba ngun wanye, shin nan hemba gban kwagh ga la.
‘Ne mba azende a am. Hanma kwagh u Terem a soo ér m ôr ne cii yô, ka m ôr ne. Ica ia kera gba ga tsô, me hide me yem sha, me za kohol Terem. Kpa ne yô, ne lu her. Nahan yô, doo nen ayol a en. Kwagh la una na ior vea fa er ne lu mbahenen av yô. Doo nen ayol a en vough er mo kpa ne doom ishima nahan.’
Tsô Yesu er msen, zamber a Yehova ér a kura mbahenen nav cii. A sôn ér Yehova a wase ve ve eren tom ken mzough man ken bem. Shi a sôn ér i tsegha iti i Yehova. Maa Yesu vea mbahenen nav wa icam i wuese Yehova. Mba kuren icam la yô, ve due ken won. Hen shighe ne, zurum u a kôr Yesu.
“Ne anikyumuile u kpeghee ne, de cie nen ga! Gadia i doo Ter wen u nan ne tartor la.”—Luka 12:32
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Er Nan Ve Mbashiada mba Yehova Ve Umbur Kwaghyan u Ter u Aikighe la Er Ukwaghaôndo Mbagenev Nahan Ga?
Shi mba yer un kpaa ér Kwaghyan u Aikighe u Masetyô shin Mkombo u Umbur Ku u Kristu, ka mkombo u a hembe lun Mbashiada mba Yehova icighan kwagh yô. Nenge kwagh u Bibilo i er sha kwagh u mkombo ne yô.
