Ase Juda wakasalaka fɛtɛ k’Elekanelo ɔnɔnyi tshɛ, ngɔndɔ ka Nisana 14. Fɛtɛ kɛsɔ aki dia mbawaohola woho wakaatshungola Jehowa oma lo lɔhɔmbɔ l’Edjibito ndo mbatɔla lo nkɛtɛ ya Daka. Lo ɔnɔnyi wa 33 T.D., Yeso la apɔstɔlɔ ande wakasale fɛtɛ k’Elekanelo lo luudu lɔmɔtshi la la diko la la Jɛrusalɛma. L’ekomelo k’olelo, Yeso akate ate: ‘Ɔmɔtshi la l’atei anyu ayanga fungami.’ Apɔstɔlɔ wakaambe ndo wakambola Yeso ɔnɛ: ‘Akɔna?’ Yeso akate ate: ‘Pami kayangami mbisha mapa ɔnɛ.’ Ko nde akasha Judasɛ Iskariyɔtɛ ɛtshi ka mapa. Mbala kakɔ ɔtɔi, Judasɛ akonɛɛ ndo akatombe oma lo luudu.

Ko Yeso akasale dɔmbɛlɔ, akaatshatsha mapa ndo akasha apɔstɔlɔ wakatshikala. Nde akate ate: ‘Nyole mapa ɔnɛ. Vɔ wekɔ didjidji dia demba diami diayomokimɔ dikambo dianyu.’ Oma laasɔ, nde akasale dɔmbɛlɔ dikambo dia wanu ko akawasha apɔstɔlɔ ande. Ko nde akate ate: ‘Nyɔnɔ wanu anɛ. Vɔ wekɔ didjidji dia dikila diami diayomokimɔ dia pɛkato dimanyiyama. Lambolaka dia nyu nyayonga nkumi ya dikanga kaamɛ la mi l’olongo. Kanyosalake ɔnkɔnɛ ɔnɔnyi tshɛ dia mbohɔkami.’ Ambeki waki Yeso waakatetemala nsangana la dikɔlɔ sɔ ɔnɔnyi tshɛ. Losanganya lɔsɔ mbelamɛka ɛlɔ kɛnɛ ɔnɛ Dambo dia dikɔlɔ dia Nkumadiɔndjɔ.

 L’ɔkɔngɔ wa vɔ ndɛ, apɔstɔlɔ wakawane dia mbeya ɔnɛ lakaleke woke l’atei awɔ. Koko Yeso akawatɛ ate: Ɔnɛ loleki woke l’atei anyu ekɔ ɔnɛ lɛnama dia nde mboleki tshitshɛ, onto loleki tshɛ bu ohomba.

‘Nyu nyekɔ angɛnyi ami. Lekɔ lo nyotɛ dui tshɛ dialanga Papa dia nyotɛ. Kem’edja dimi layanga ntshɔ le Papa l’olongo. Nyu nyayotshikala ndo anto wayeya dia nyu nyekɔ ambeki ami oma lo ngandji kayonyokana lam’asanyu. Nyu pombaka mbokana ngandji lam’asanyu oko woho wakamanyoke ngandji.’

L’ekomelo, Yeso akalɔmbɛ Jehowa dia nkokɛ ambeki ande tshɛ. Nde akalɔmbɛ Jehowa dia nde mbakimanyiya dia vɔ nkamba lo kaamɛ lo wɔladi. Nde akalɔmbɛ dia lokombo la Jehowa kidiama. Oma laasɔ, Yeso l’apɔstɔlɔ ande wakembe esambo wa ntombola Jehowa, ko wakatombe. Wonya wa Yeso mindama waki suke.