Munyaka amunyaka muNisani 14, maJuda bakali kusekelela pobwe lyaPasika. Pobwe eeli lyakali kubayeezya Jehova mbaakabagwisya mubuzike kuEgepita kabatola Kunyika Yachisyomezyo. Jesu abaapostolo bakwe bakasekelela pobwe lyaPasika lyamu33 C.E., mung’anda yamujulu kuJerusalemu. Nibakamaninsya kulya, Jesu wakati: ‘Umwi akati kanu uzoonduuzya.’ Baapostolo bakakataazikana alimwi bakabuzya Jesu kuti: ‘Ngwani utakuuzye?’ Jesu wakati: ‘Muntu ngundilikupa chinkwa eechi.’ Mpawo wakapa Judasi Iskkariyoti chinkwa. Judasi wakazwa mung’anda mpawaawo.

Jesu wakakomba mpawo wakakomona chinkwa akuchipa baapostolo. Wakati: ‘Amulye chinkwa eechi nkaambo chiiminina mubili wangu utapegwe akaambo kandinywe.’ Naakamana kukomba kachibili, wakapa baapostolo bakwe wayini. Wakati: ‘Amunywe wayini eeyi nkaambo yiiminina bulowa bwangu buyoopegwa kuchitila kuti bantu balekelelwe zibi. Ndimusyomezya kuti muyooyendelezya andime kujulu. Amuchite oobo munyaka amunyaka kamundiyeeya.’ Batobeli baJesu balabungana munyaka amunyaka goko mubuzuba bweendelana abuzuba oobo. Muswaangano ooyu utegwa Nchilalilo chaMwaami.

 Nibakamaninsya kulya, baapostolo bakakazyania atala akuti ngwani wakali mupati akati kabo. Pesi Jesu wakati: ‘Mupati kulindinywe ngooyo ulibona kali muniini kulindinywe moonse.

‘Muli beenzuma nkaambo ndilamubuzya zintu zyoonse nzyayanda kuti ndimubuzye Taata. Kwasyaala chiindi chifwiifwi kuti ndibweede kujulu kuli Taata. Mwasyaala, bantu bayooziba kuti muli basikwiiya bangu kuti kamuli aluyando akati kanu. Mweelede kuyandana mbuli mbundakamuyanda.’

Kumamanino, Jesu wakakombela kuti Jehova akwabilile basikwiiya boonse. Wakakumbila Jehova kuti abagwasye babelekelaamwi muluumuno. Wakakombela kuti zina lyaJehova lisalazigwe. Kuzwa waawo, Jesu abaapostolo bakwe bakiimba kabatembawula Jehova mpawo bakazwa aanze. Chakali chaba afwiifwi chiindi chakuti Jesu ajatwe.