SJEJEL 87
Ja Cena ja Kajwaltiki
Ja judíoʼik wa skʼintaye ja Pascua jabʼil jabʼil ja bʼa skʼakʼujil 14 bʼa yixawil nisán. Ja it wa xya julskʼujole jastal aji eluke libre yuja Jyoba ja bʼa mosoʼil bʼa Egipto sok ijiye och bʼa Luʼum Kʼapubʼal. Ja bʼa jabʼil 33, ja Jesús soka sjekabʼanumik skʼintaye ja Pascua bʼa jun kwarto bʼa nalan chaʼan ja bʼa Jerusalén. Yajni chʼak ja cena, ja Jesús yala: «June bʼa weʼnlex oj xchʼaykʼujolukon». Ja jekabʼanumik jel cham yabʼye sok sjobʼoweyi: «¿Machunkiluka?». Ja Jesús sjakʼa: «Jani ja winik it maʼ wanon yajelyi ja pan it». Anto yayi xen pan ja Judas Iscariote. Jaxa Judas stulu sbʼaj wego sok waji.
Tixa skʼulan jun orasyon ja Jesús, xetʼa jun pan sok spilayi ja jekabʼanumik matik kanyesoki. Yala yabʼ: «Loʼanik ja pan it. Jani wa senyaʼan ja jkwerpo, bʼa oj kaʼ bʼa weʼnlex». Tsaʼan, cha skʼulan jun orasyon sbʼaja vino, tixa ya ekʼyi ja jekabʼanumiki sok yala yabʼ: «Ukʼanik ja vino it. Jani wa senyaʼan ja jchikʼeli, bʼa oj kaʼe bʼa jachuk oj axuk perdon ja mulalik. Wa xkʼapawilex oj kʼotanik mandaranum jmok ja bʼa satkʼinali. Kʼulanik ja it jabʼil jabʼil bʼa oj juluka kʼujolex bʼa keʼna». Ja snochumanik ja Jesús wanto stsomo sbʼaje jabʼil jabʼil ja bʼa yajtabʼ jaw yajni wa xkʼikʼbʼi. Ja tsomjelal it wa sbʼiʼilan ja Cena ja Kajwaltiki.
Yajni chʼak ja cena, ja jekabʼanumik kʼeye kʼumal machunuk bʼa yeʼnle ja mas tʼilani. Pe ja Jesús yala yabʼye: «Ja maʼ mas tʼilan bʼa weʼnlex tʼilani mas chʼin oj ya sbʼaj».
Ja Jesús cha yala: «Ja weʼnlexi kʼotelex kamigo. Ja yuj wa xkala wabʼyex yibʼanal ja jas wa skʼana oj kala wabʼyex ja jTati. Ojxta kumxukon man satkʼinal, ja bʼay ja jTati. Pe ja weʼnlex ti oj kananik ili, sok ja ixuk winik oj snaʼe weʼnlex ja jnebʼumaniki yuja oja yajta bʼajexi. Tʼilan oja yajta bʼajex jastal yajtunejex».
Tixa xchʼakakan ja Jesús sok jun orasyon skʼanjelyi ja Jyoba bʼa a-stalna yibʼanal ja snebʼumaniki sok a-skoltay bʼa aʼatijuke lajan sok laman. Cha yayi orasyon bʼa asakbʼuk ja sbʼiʼil ja Jyoba. Tsaʼan, ja Jesús soka sjekabʼanumik stsʼebʼantaye tsʼebʼojik bʼa Jyoba sok tixa elyeʼa. Ojxtani yamjuk ja Jesús.
«Mi laxiwyex. ja we‘nlex chʼin kʼole. ja watatexi wa skʼana oj ya‘ awi‘lex ja [Gobyerno]» (Lucas 12:32, YD).
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jas yuj ja taʼumantiʼik bʼa Jyoba tuk wa xkʼulantikon ja Cena ja Kajwaltik yuja tuk relijyoniki?
Chomajkil sbʼiʼil ja cena ja kajwaltik ma yajel juljkʼujoltik ja xchamelal ja Jesús. Ja it jani ja tsomjelal mas chaʼanyabʼal wa skʼulane ja taʼumantiʼik bʼa Jyoba. Kʼela ja jas wa xyala ja Biblia sbʼaja it.
