Lembe ni lembe, a vaJudha va waga Phasika hi siku ga 14 ka hweti ya Nisani. A Phasika gi wa va alakanyisa lezvi Jehovha a nga va tlhatlhisisa zvona wubochweni le Gibhite zvonake a va yisa Tikweni gi Tsumbisilweko. Hi lembe ga 33 Nguveni ya Hina, Jesu ni vapostoli vakwe va noga Phasika lomu ndlwini ya lehehla le Jerusalema. Loku va mbhetile kuga, Jesu i no va byela lezvi: ‘A mun’we wa n’wina i ta ndzi nyikela ndzi dawa’. A vapostoli va no karateka nguvhu, va wutisa Jesu vaku: ‘Hi mani wa kona’? Jesu aku: ‘Hi loyi ndzi mu nyikako a pawa leyi’. I no teka cikhemu ca pawa a nyika Judhasi Iskariyoti. Judhasi i no tekela ku suka a famba.

Jesu i no gumesa a maha mukombelo, a khemelela pawa a nyika vapostoli lava va nga sele, aku: ‘Ganani a pawa leyi. Yi yimela miri wa mina, lowu ndzi to wu nyikela hi kota ya n’wina’. I no kombelela vhinya a nyika vapostoli vakwe, aku: ‘Nwanani a vhinya legi. Gi yimela nkhata wa mina, lowu ndzi to wu nyikela kasi ku tsetselelwa zviwonho. Ndzi mu tsumbisa lezvi: Mu tava tihosi na mina le tilweni. Lembe ni lembe, mahani lezvi kasi ku ndzi alakanya’. Lembe ni lembe, a valandzeli va Jesu va ha tlhangana ka wusikwana lego. A mutlhangano lowo wu vitaniwa ku Cilalelo ca Hosi.

 Loku va mbhetile kuga, a vapostoli va no holovisana va lava ku tiva loyi a nga wa lisima laha kabye. Kanilezvi, Jesu i no va byela lezvi: ‘A wa lisima laha ka n’wina hi loyi a ti wonako na a hi mutsongwani, na a nga hi na lisima ka van’wani.

‘N’wina mu vanghana va mina. Ndzi mu byela zvontlhe lezvi Papayi a lavako ku ndzi mu byela. Na ku nga hi kale, ndzi ta famba ka Papayi le tilweni. N’wina mu ta sala. A vanhu va ta zvi tiva a ku mu vapizani va mina loku mu randzana. Mu fanele ku randzanisa zvezvi mina ndzi mu randzisako zvona.’

Hi kugumesa, Jesu i no maha mukombelo ka Jehovha. I no kombela Jehovha lezvaku a vhikela vapizani vakwe ni lezvaku va sala va tira zvin’we hi kurula. I no kombelela lezvaku a vito ga Jehovha gi basisiwa. Andzhako ka lezvo, Jesu ni vapostoli vakwe va no yimbelela va dhumisa Jehovha zvonake va huma va famba. Makunu ci wa chikela cikhati ca ku Jesu a khon’wa.