Buli mwaka, ebiro 14, okwezi okwa Nisani, Abayudaaya bakuzaaga ekiro eky’Okuhingurwaho. Ekiro kinu kyabaijukyaga nk’oku Yahwe akaba abaihire omu bwiru kuruga omu ihanga lya Misiri kwija omu Nsi Eyali Ebaraganiziibwe. Omu mwaka gwa 33 C.E., Yesu hamu n’abakwenda be bakajaguliza omukoro ogw’Okuhingurwaho omu Yerusalemu omu nju ey’ekisiika ekya haiguru. Hanyuma y’ekiihuro, Yesu akagamba ati: ‘Omu hali inywe nagenda kungobeza.’ Abakwenda bakahunirra muno, kandi bakaguza Yesu bati: ‘Noha?’ Yesu akabagarukamu ati: ‘Nuwe onu oundukuha omugati.’ Hanyuma akakwasa Yuda Isikalyota omugati. Aho n’aho, Yuda akaturuka yagenda.

Hanyuma Yesu akasaba, yabaganizaamu omugati kandi yagabira abakwenda abakaba basigaire. Yesu akagamba ati: ‘Mulye omugaati gunu. Nigumanyisa omubiri gwange, ogundukwija kuhayo habwanyu.’ Akongera yasabira eviino kandi yagihabaha banywe. Akagamba ati: ‘Munywe eviino enu. N’emanyisa esagama yange, eyindukwija kusesa habw’ebibi byanyu. Kandi nimbaraganiza ngu nitwija kulema hamu nk’abakama omu iguru. Mukolege kinu buli mwaka okwijuka nyowe.’ Abahondezi be nahati baijuka ekiro eki buli  mwaka. Oruso’rokano oru hati nirwetwa Ekiihuro kya Mukama Waitu.

Obu bamazire kulya, abakwenda bakatandika kukunganira obukuru. Baitu, Yesu akabagambira ati: ‘Omukuru omuli inywe, nuwe ogu arukwetwaza nk’omwana.’

‘Muli banywani bange. Kandi nimbagambira byona Ise nyowe eby’arukugonza mbagambire. Omu kasumi akatali kahara ninyija kugenda omwa Ise nyowe omu iguru. Nimwija kusigara, baitu abantu nibaija kumanya nk’oku muli begeswa bange habw’okugonzangana kwanyu. Musemeriire kugonzangana nk’oku nanyowe mbolekere okugonza.’

Hanyuma, Yesu akasaba Yahwe ngu alinde abegeswa be boona, kandi ngu abakonyere kukorra hamu omu businge. Kandi akasaba nukwo ibara lya Yahwe lisobole kwezebwa. Yesu n’abakwenda be obu bamazire, bakazina ebizina by’okukugiza Yahwe hanyuma baturuka bagenda. Obwire bwa Yesu kukwatwa bukaba buli haihi kuhika.