SAMBIRO 87
Yesu Wakarya Mugonero Waumaliro
Chaka chilichose, pa zuŵa la 14 la mwezi wa Nisani, Ŵayuda ŵakachitanga Paska. Chikondwelero ichi chikaŵakumbuskanga umo Yehova wakaŵawombolera ku wuzga ku Eguputo na kuluta nawo ku Charu cha Layizgano. Mu chaka cha 33 C.E., Yesu na ŵapositole ŵake ŵakachita Paska mu chipinda chamuchanya ku Yerusalemu. Pa nyengo iyi, Yesu wakati: ‘Yumoza wa imwe wanipelekenge.’ Ŵapositole ŵakazizikika, ndipo ŵakati kwa Yesu: ‘Ni njani wakukhumba kuchita ichi?’ Yesu wakati: ‘Ni uyo nimupenge chingwa ichi.’ Kufuma apo, wakapeleka kachingwa kwa Yudasi Isikariyoti. Nyengo yeneyiyo, Yudasi wakanyamuka na kufumamo mu chipinda.
Pamanyuma, Yesu wakalomba na kumenya chingwa, ndipo wakachipeleka ku ŵapositole awo ŵakakhalapo. Wakati: ‘Ryani chingwa ichi. Chikwimira thupi lane, ilo nilipelekenge chifukwa cha imwe.’ Kufuma apo, wakalombera vinyo, ndipo wakalipeleka ku ŵapositole. Yesu wakati: ‘Mwani vinyo ili. Likwimira ndopa zane, izo zithiskikenge mwakuti zakwananga za ŵanthu zigowokereke. Nkhumulayizgani kuti muzamuŵa mathemba pamoza na ine kuchanya. Chaka chilichose muchitenge ichi kuti munikumbukenge.’ M’paka lero, chaka chilichose ŵalondezgi ŵa Yesu ŵakuwungana pamoza kuchita chikondwelero ichi pa deti lanthena ili. Chikondwelero ichi, ndicho sono chikuchemeka Mugonero wa Fumu.
Ŵakati ŵamara mugonero, ŵapositole ŵakamba kulimbana kuti ni njani wakaŵa wakuzirwa chomene pakati pawo. Kweni Yesu wakaŵaphalira kuti: ‘Uyo ni mulara chomene pakati pinu ni uyo wakujiwona nga ni muchoko, panji kuti wambura kuzirwa.
‘Ndimwe ŵabwezi ŵane. Nkhumuphalirani vyose ivyo Adada ŵakukhumba kuti nimuphalirani. Sonosono apa, nkhuluta kwa Adada kuchanya. Imwe mukhalenge, kweni ŵanthu ŵamanyenge kuti muli ŵasambiri ŵane para mukutemwana. Mutemwanenge nga umo ine nkhumutemwerani.’
Paumaliro, Yesu wakalomba, kupempha Yehova kuti wavikilire ŵasambiri ŵake wose. Wakapempha Yehova kuti waŵawovwire kuti ŵakhalenge mwamtende. Wakalomba kuti zina la Yehova lituŵiskike. Kufuma apo, Yesu na ŵapositole ŵake ŵakimba sumu zakulumba Yehova ndipo ŵakafuma mu nyumba. Nyengo yakuti Yesu wakakike yikaŵa pafupi kukwana.
“Kopa chara imwe ŵakamskambo kachoko, chifukwa Awiskemwe ŵazomerezga kumupani Ufumu.”—Luka 12:3
Panji Mungatemwa Kuŵerengaso Nkhani Izi
YESU NI NTHOWA, UNENESKO, NA UMOYO
Mugonero wa Fumu
Yesu wakambiska chikumbusko kuti ŵalondezgi ŵake ŵachitenge chaka chilichose pa Nisani 14.
YESU NI NTHOWA, UNENESKO, NA UMOYO
Wakaŵasambizga Kujiyuyura pa Paska Laumaliro
Ŵapositole ŵakazizwa kuwona Yesu wakuchita mulimo wa muzga.
YESU NI NTHOWA, UNENESKO, NA UMOYO
Lurombo Lwaumaliro mu Chipinda Chamuchanya
Yesu wakalongosora kuti wakafiska chinthu chakuzirwa chomene padera pakuponoska ŵanthu.
IVYO ŴANTHU ŴAKUTEMWA KUFUMBA
Chifukwa Wuli Ŵakaboni ŵa Yehova Ŵakupanga Mugonero wa Fumu Mwakupambana na Matchalitchi Ghanyake?
Mugonero wa Fumu panji kuti Chikumbusko, ntchakuchitika chapadera chomene ku Ŵakaboni ŵa Yehova. Wonani ivyo Baibolo likuyowoya vyakukhwaskana na chakuchitika ichi.
