Иудейлер чыл санында нисан 14-те Хосталыышкын байырлалын эрттирер турган. Ол байырлал Иегованың оларны Египетке кулданыгдан хостааш, Аазаттынган черже эккелгенин сагындырып турган. Бистиң эраның 33 чылда Иисус элчиннери-биле Иерусалимде бир бажыңның кырыкы өрээлинге Хосталыышкын байырлалын эрттирер дээш чыглып келген. Кежээки чем соонда Иисус: «Силерниң бирээңер мени садыптар» — дээн. Элчиннер аажок кайгап, айтырган: «Ол кым ирги?» Иисус: «Бо хлебти сунуптар кижим ол болур» — дээш, хлебти Иуда Искариотче сунупкан. Иуда доп-дораан тура халааш, өрээлден үне берген.

Ооң соонда Иисус мөргээш, хлебти үскеш, элчиннерге үлеп берген. Ол мынча дээн: «Бо хлебти чиңер, ол силер дээш бээр мага-бодумну илередип турар». Оон ол кызыл араганы алгаш, мөргээш, база оларже сунган: «Бо кызыл араганы ижиңер, ол силерниң бачыттарыңар өршээттинзин дээш төгер ханымны илередип турар. А силер мээң-биле дээрге хааннар боор силер. Мени сактып, мынчаар чыл санында кылып чоруңар». Иисустуң эдерикчилери ам-даа ол кежээни демдеглеп, чыглып турар. Ол ужуражылганы Иисус Христостуң өлгениниң дугайында Сактыышкын кежээзи деп адаар.

 Кежээки чем соонда элчиннер оларның кайызы кол дээш маргыжып эгелээн. Ынчалза-даа Иисус: «Өрү көрдүнмейн, бодун өскелерден бичии кылдыр санаар кижи эң кол болур» — дээн.

Иисус уламчылаан: «Силер мээң эш-өөрүм силер. Адамның силерге дамчыдыксаан шупту чүүлүн чугаалап бердим. Удавас мен дээрде Адамче чоруптар мен. А силер маңаа артып каар силер. Бот-боттарыңарга ынак боор болзуңарза, улус силерни мээң өөреникчилерим деп танып каар. Мээң силерге ынаам дег, силер база бот-боттарыңарга ынак болуңар».

Оон Иисус шупту өөреникчилерин камгалаарын база оларның аразынга тайбың турар кылдыр, Иеговадан мөргүп дилээн. Бурганның ады алдаржыыр кылдыр база мөргээн. Оон Иисус элчиннери-биле мактал ырыларны ырлааш, ол бажыңдан чорупкан. Дайзыннары удавас Иисусту тудуп аппаар.