OCIPAMA 87
Ondalelo ya Sulako ya Yesu
Va Yudea va enda oku linga ocipito co Paskoa unyamo lunyamo keteke 14 kosãi ya Nisana. Ocipito caco ca enda oku va ivaluisa ndomo Yehova a va yovola kupika Kegito loku va tuala Vofeka Yohuminyo. Kunyamo wo 33 K.K., Yesu kumue lovapostolo vaye va linga ocipito co Paskoa vohondo yimue yinene kosapalalo ko Yerusalãi. Kesulilo liondalelo, Yesu wa popia hati: ‘Umue pokati kene o laika oku makula.’ Olondaka viaco via saluisa ovapostolo, kuenje va pula Yesu vati: ‘Omunu waco helie?’ Yesu wa tambulula hati: ‘Omunu una ndĩha kombolo eyi.’ Noke Yesu wa eca okambolo kamue ku Yuda Isikariote. Vepuluvi liaco, Yuda wa votoka kuenje wa tunda vohondo.
Noke, Yesu wa likutilila, wa tikula ombolo kuenje wa yi timbola loku yeca kovapostolo va supapo. Eye wa popia hati: ‘Li ombolo eyi. Oyo yi lomboloka etimba liange ndi laika oku eca kokuene.’ Noke Yesu wa linga ohutililo yatiamẽla kovinyu, yu wa yeca kovapostolo vaye. Eye wa popia hati: ‘Nyui ovinyu eyi. Oyo yi lomboloka osonde yange ndi laika oku eca oco akandu a eceliwe. Ame ndu likuminyi okuti vu ka kala olosoma kumue lame kilu. Ci lingaingi anyamo osi oku njivaluka.’ Olondonge via Yesu, handi via siata oku liongolola anyamo osi vuteke waco. Ohongele yaco cilo yi tukuiwa hati, Ocipito Condalelo ya Ñala.
Noke yondalelo, ovapostolo va fetika oku lihoyisa nda helie wa velapo pokati kavo. Pole, Yesu wa va sapuila hati: ‘Una wa velapo pokati kene a linge umalẽhe, ndomunu o sule.
‘Ene wakamba vange. Ame ndu sapuili ovina viosi Isiange a yongola okuti ndu vi lomboluili. Ndopo ngenda ku Isiange kilu. Ene vu siala kuenda omanu va ka limbuka okuti vulondonge viange omo liocisola vu likuetele pokati. Ene vu sukila oku lisola pokati ndeci ame ndo soli.’
Kuenje Yesu wa likutilila oku pinga ku Yehova oco a teyuile olondonge viosi. Eye wa pinga ku Yehova oco a va kuatise okuti va talavaya kumosi lombembua. Wa likutililavo oco onduko ya Yehova yi sumbiwe. Noke Yesu kumue lovapostolo vaye va imba ovisungo viesivayo ku Yehova kuenje va tunda. Otembo ya kala oku pitĩla oco Yesu a kuatiwe.
“Akacunda, ku ka kuate usumba, momo Isiene wa tava oku wĩhi Usoma.”—Luka 12:32
Ove o ka ci Sola
YESU—ONJILA, OCILI HAEYE OMUENYO
Ondalelo ya Ñala
Yesu wa tumbika ocipito conjivaluko oco olondonge viaye vi ci ivaluke unyamo lunyamo keteke 14 ya Nisana.
YESU—ONJILA, OCILI HAEYE OMUENYO
Ulandu Umue Woku Longisa Umbombe ko Paskoa ya Sulako
Eye o linga upange wupika okuti wa komõhisa ovapostolo.
YESU—ONJILA, OCILI HAEYE OMUENYO
Ohutililo ya Sulako ya Yesu Vohondo yo Kosapalalo
Eye wa lekisa okuti wa linga ovina vialua vi kuete esilivilo okuti oku nena lika eyovo komanu ci sule.
APULILO A SIATA
Momo Lie Olombangi Via Yehova vi Lingila Ocipito Condalelo ya Ñala Lonjila ya Litepa Latavo Akuavo?
Ocipito ci tukuiwavo okuti Ondalelo ya Sulako, ale Onjivaluko, oco ocipito ca velapo Colombangi Via Yehova. Kũlĩhĩsa eci Embimbiliya li popia catiamẽla kocipito caco.
