Vhayuda vho vha vha tshi pembelela Paseka ṅwaha muṅwe na muṅwe nga dzi 14 dza ṅwedzi wa Nisan. Hezwi zwo vha zwi tshi vha humbudza nḓila ye Yehova a vha vhofholola ngayo vhupulini ngei Egipita nahone a vha isa Shangoni ḽo Fulufhedziswaho. Nga ṅwaha wa 33 C.E., Yesu na vhaapostola vhawe vho pembelela Paseka kamarani ya nṱha ngei Yerusalema. Musi vho no fhedza u ḽa, Yesu o ri: ‘Muṅwe waṋu u ḓo nthengisa.’ Vhaapostola vho vha vho mangala vhukuma, nahone vha vhudzisa Yesu vha ri: ‘Ndi nnyi onoyo?’ Yesu a ri: ‘Ndi ane nda ḓo mu fha hovhu vhurotho.’ Nga murahu a fha Yudasi Iskariote tshipiḓa tsha vhurotho. Nga u ṱavhanya Yudasi a takuwa nahone a bva henefho kamarani.

Nga murahu Yesu a rabela, a ṅwata vhurotho ha vha zwipiḓa, nahone a vhu fha vhaapostola vho salaho. A ri: ‘Iḽani hovhu vhurotho. Vhu imela muvhili wanga, une nda ḓo u ṋekedza ndi tshi itela inwi.’ Nga murahu a rabelela waini nahone a i fha vhaapostola vhawe. A ri: ‘Inwani heyi waini. I imela malofha anga, ane nda ḓo a ṋekedza u itela uri zwivhi zwaṋu zwi hangwelwe. Ndi a ni fhulufhedzisa uri ni ḓo vha mahosi na nṋe ngei ṱaḓulu. Ni ite zwenezwi ṅwaha muṅwe na muṅwe u itela u nkhumbula.’ Vhatevheli vha Yesu vha kha ḓi ṱangana nga vhusiku ha ḽeneḽo ḓuvha ṅwaha muṅwe na muṅwe. Honoho u kuvhangana hu vhidzwa Tshilalelo tsha Murena.

 Musi vho no fhedza u ḽa, vhaapostola vho thoma u ṱaṱisana nga uri ndi nnyi ane a vha wa nṱha u fhira muṅwe. Fhedzi Yesu a vha vhudza a ri: ‘Ane a vha wa nṱhesa vhukati ha vhoiwe ndi ane a ḓidzhia e muṱukusa, e ene wa fhasisa’.

‘Ni khonani dzanga. Ndo ni vhudza zwoṱhe zwine Khotsi anga a ṱoḓa ndi tshi ni vhudza zwone. Hu si kale ndi khou u ya ha Khotsi anga ngei ṱaḓulu. Vhoiwe ni ḓo sala, nahone vhathu vha ḓo ḓivha uri ni vhafunziwa vhanga nga nḓila ine na funana ngayo. Ni fanela u funana samusi na nṋe ndo ni funa.’

Mafheleloni, Yesu a rabela a tshi humbela uri Yehova a tsireledze vhafunziwa vhawe. O humbela Yehova uri a vha thuse u ri vha shume vhoṱhe nga vhuthihi. O rabelela uri dzina ḽa Yehova ḽi itwe ḽikhethwa. Nga murahu Yesu na vhaapostola vha imbela Yehova dzithendo nahone vha bvela nnḓa. Tshifhinga tsha uri Yesu a fariwe tsho vha tshi tsini.