Ginsasaurog han mga Judio an Paskua kada ika-14 han bulan han Nisan. Nagpapahinumdom ini ha ira kon paonan-o hira gintalwas ni Jehova tikang ha pagkauripon ha Ehipto ngan gindara ha Tuna nga Iginsaad. Han tuig 33 C.E., hi Jesus ngan an iya mga apostol nagsaurog han Paskua ha igbaw nga kwarto han usa nga balay ha Jerusalem. Han hirani na hira matapos pangaon, hi Jesus nagsiring: ‘Usa ha iyo an magtatraydor ha akon.’ Nakalasan an mga apostol, ngan nagpakiana: ‘Hin-o?’ Hi Jesus binaton: ‘An lalaki nga tatagan ko hini nga tinapay.’ Katapos, gintagan niya hin tinapay hi Judas Iscariote. Binuhat dayon hi Judas ngan linakat.

Kahuman, nag-ampo hi Jesus, nagtipiktipik hin tinapay, ngan iginhatag ito ha nabilin nga mga apostol. Hiya nagsiring: ‘Kaona niyo ini nga tinapay. Nagrirepresentar ini han akon lawas nga akon ihahatag para ha iyo.’ Tapos, nag-ampo hiya para ha bino ngan iginhatag ito ha ira. Hiya nagsiring: ‘Inoma niyo ini nga bino. Nagrirepresentar ini han akon dugo nga akon ihahatag basi mapasaylo an mga sala. Nagsasaad ako nga magigin mga hadi kamo kaupod ko ha langit. Buhata niyo ini kada tuig sugad nga paghinumdom ha akon.’ An mga sumurunod ni Jesus padayon pa gihap nga nagkakatirok ha gab-i han amo gihapon nga petsa kada tuig. Ito nga katirok gintatawag yana nga Panihapon han Ginoo.

 Katapos mangaon, nagdiskusyon an mga apostol kon hin-o ha ira an pinakaimportante. Pero ginsidngan hira ni Jesus: ‘An may gidadakui nga awtoridad ha iyo amo adton gintatagad an iya kalugaringon nga gimanghuri, an giuubusi.

‘Kasangkayan ko kamo. Iginsusumat ko an ngatanan nga karuyag han akon Amay nga isumat ko ha iyo. Diri na maiha, makadto ako ha akon Amay ha langit. Mabibilin kamo, ngan makikilala han mga tawo nga mga disipulo ko kamo tungod han iyo gugma ha usa kag usa. Higugmaa niyo an kada tagsa sugad han akon paghigugma ha iyo.’

Ha urhi, nag-ampo hi Jesus nga proteksyonan ni Jehova an ngatanan niya nga disipulo. Ginhangyo niya hi Jehova nga buligan hira nga magin mamurayawon samtang urosa nga nagbubuhat. Nag-ampo hiya nga mabaraan an ngaran ni Jehova. Katapos, hi Jesus ngan an iya mga apostol nagkanta hin mga pagdayaw kan Jehova ngan kinadto ha gawas. Hito nga takna, hirani na hi Jesus arestuhon.