Isaka taon̈o, koa fa 14 Nisana, iro Jiosy aby io nankalaza Pasky. Zen̈y nampatsiaro iro fa Jehovah nan̈adoso iro andevo ta Ezipta, baka io nitondra iro tamy Tany Nampan̈antinain̈y. Nankalaza Pasky taminy efitry araiky tan̈abo etazy ta Jerosalema tao Jesosy ndreky apostoly aby io, tamy taon̈o 33. Iro koa fa baka nihina, Jesosy nivolan̈a: ‘Araiky aminaro hamadiky zaho.’ Taitry iro apostoly aby io, ke iro nan̈ontany: ‘Azovy eky?’ Ho Jesosy: ‘Lan̈iany olo hamiako mofo ty izy.’ Nanapaka mofo izy baka tio, ke namiany Jodasy Iskariota. Niaraka tamy zen̈y, Jodasy nitsangana, niboaka.

Nivavaka amy zay Jesosy, nangala mofo izy, nirasirasainy tamindro apostoly tavela tio. Izy nivolan̈a: ‘Hahana mofo ty. Iritrireta karaha vatan̈anaka handeha hamiako anaro izy ty.’ Nivavaka ndraiky koa izy, namiany divain iro apostoly aby io. Hoizy: ‘Igiaha divain ty. Iritrireta karaha lionaka handeha hamiako anaro izy ty, amy zen̈y fahotan̈anolo voafafa. Hanjary panjaka hiaraka hanjaka aminaka andan̈itry an̈y koa anaro. Ke ataova fo izy ty isaka taon̈o, hahatsiarovan̈a zaho.’ Mbala nan̈ano fivorian̈a karaha io pianatra Jesosy aby io, isaka taon̈o. Hariva an̈anovan̈a izio, Sakafo Harivany Tompo ikahian̈a izio amy zioty.

 Iro koa fa baka nihina, iro apostoly aby io nimalo azovy amindro bebe. Jesosy ndraiky nivolan̈a: ‘Lan̈iany mieritreritry ain̈inany farany ambany, izy farany an̈abo.

‘Anaro kamaradiko. Volan̈iko aminaro raha jiaby tiany Babako koran̈iny aminaro. Zaho efa tsy ela himpody amy Babako andan̈itry an̈y, fa anaro ndraiky mbala hijanon̈o eto. Anaro koa mifankatia, ho hainolo fa anaro pianatranaka. Tokony hifankatia anaro, karaha nataoko tia anaro.’

Nivavaka Jesosy baka tio, nangataka tamy Jehovah hiaro pianatranany ndreky han̈ampy iro hahay hiaraka hiasa. Nivavaka koa izy, baka an̈aran̈a Jehovah hankamasin̈iny. Jesosy ndreky apostoly aby io baka tio nihira nidera Jehovah. Iro amy zay nandeha niboaka. Efa tsy ela Jesosy hisamborin̈y.