Ayuda ŵatendaga cindimba ca Pasaka caka cilicose. Cindimbaci catendekwaga palisiku lya 14 lya mwesi wa Nisani. Jemanjaji ŵatendaga cindimbaci pakumbucila yaŵatesile Yehofa pakwagopola ku ukapolo wa ku Iguputo soni pakwajawusya mu Cilambo ca Cilanga. M’caka ca 33 C.E., Yesu yalumo ni ŵandumetume ŵakwe ŵasongene m’cipinda camwinani ku Yelusalemu kuti atende cindimba ca Pasaka. Pambesi pa cindimbaco, Yesu ŵatite, ‘Jumo mwa jemanja cambelece une kwa acimmagongo.’ Ŵandumetumewo ŵasimonjile, mwamti ŵam’wusisye Yesu kuti, ‘Ali ŵani?’ Yesu ŵatite, ‘Ali mundu jucinampe mkate awu.’ Kaneko jwalakwe ŵampele Yudasi Isikaliyoti mkatewo. Mwangacelewa, Yudasi jwakopwece m’cipindamo.

Kaneko Yesu ŵapopesile, ni ŵawugaŵenyegaŵenye mkatewo ni ŵapele ŵandumetume ŵaŵasigelewo. Jwalakwe jwatite, ‘Alye mkatewu. Ukwimila cilu cangu, cacinjicipeleka m’malo mwa jemanja.’ Kaneko ŵapelecesoni lipopelo lya finyo ni ŵapele ŵandumetume ŵala. Ni ŵatite, ‘Amwe finyoju. Jukwimila miyasi jangu, jacinjijipeleka kuti yakulemwa ya ŵandu yikululucidwe. Ngutenda cilanga ni jemanja kuti caciŵa acayimwene yalumo ni une kwinani. Atendeje yeleyi caka cilicose pakusaka kungumbucila.’ Ŵakumkuya ŵa Yesu akusasonganaga palisiku lyeleli caka cilicose. Msongano welewu ukusakolanjidwa kuti Cakulya Caligulo ca Ambuje.

 Pambesi pa cindimbaci, ŵandumetume ŵakanganile pakwamba ya mundu juŵaliji jwakusosekwa mnope pasikati pawo. Nambo Yesu ŵasalile kuti, ‘Jwamkulungwa pasikati pa jemanja ali jwakusaliwona kuŵa jwamnandi.

‘Jemanja mli acimjangu. Ngumsalila yiliyose yakusaka Atati ŵangu kuti namsalile. Pacangakaŵa ngwawula kwa Atati ŵangu kwinani. Jemanja cimsigale, soni ŵandu cacimanyilila kuti mli ŵakulijiganya ŵangu ligongo lya cinonyelo cacili pasikati penu. Mnonyelaneje jwine ni mjakwe mpela yandite une pakumnonyela jemanja.’

Pambesi pakwe Yesu ŵapopelele ŵandumetumewo kuti Yehofa ŵacenjele. Jwalakwe ŵam’ŵendile Yehofa kuti ŵakamucisye jemanjajo kuti akamuleje masengo mwakamulana. Ŵapopesilesoni kuti lina lya Yehofa liswejesyedwe. Kaneko Yesu yalumo ni ŵandumetume ŵakwewo ŵajimbile nyimbo syakumlumba Yehofa, pambesi pakwe ŵakopwece pasa. Sambano ndaŵi jakuti Yesu ataŵidwe jaliji jili jiŵandicile.