Le judíoʼoboʼ cada año ku kʼiinbeskoʼob kaʼach le Pascua tu kʼiinil 14 tiʼ nisanoʼ. Bey u kʼaʼajsikoʼob kaʼach bix jóoʼsaʼabikoʼob tumen Jéeoba tu luʼumil Egipto yéetel bix úuchik u bisaʼaloʼob teʼ Luʼum Aʼalaʼan u Tsʼaʼabaltiʼoboʼ. Tu añoil 33, Jesús yéetel u apostoloʼobeʼ tu kʼiinbesoʼob le Pascua tiʼ junpʼéel cuarto yaan tu kaʼanlil junpʼéel naj, tu kaajil Jerusalén. Le taʼaytak u tsʼoʼokol u jaanloʼoboʼ, Jesuseʼ tu yaʼalaj: ‹Juntúul tiʼ teʼexeʼ yaan u traicionartiken›. Le apostoloʼoboʼ jaʼakʼ u yóoloʼobeʼ ka tu kʼáatoʼobtiʼ: ‹¿Máax le ka waʼalikoʼ?›. Jesuseʼ tu yaʼalajtiʼob: ‹Letiʼe máax tiʼ ken in tsʼáa le junxéetʼ waajaʼ›. Ka túun tu tsʼáaj junxéetʼ waaj tiʼ Judas Iscariote. Tu séebaʼanileʼ Judaseʼ líikʼeʼ ka bini.

Ka tsʼoʼokeʼ Jesuseʼ tu beetaj junpʼéel oración, tu xetʼaj junpʼéel waajeʼ ka tu tʼoxaj tiʼ le apostoloʼob pʼatoʼob tu yéeteloʼ. Tu yaʼalajtiʼob: ‹Jaanteʼex le waajaʼ. Lelaʼ ku chíikbesik in wíinklil ken in kʼub ta woʼolaleʼex›. Tu beetaj xan junpʼéel oración yoʼolal le vinooʼ, tsʼoʼoleʼ tu máansaj tiʼ u apostoloʼobeʼ ka tu yaʼalajtiʼob: ‹Ukʼeʼex le vinoaʼ. Lelaʼ ku chíikbesik in kʼiʼikʼel ken in tsʼáa utiaʼal u perdonartaʼal le kʼebanoʼoboʼ. Kin waʼalikteʼexeʼ yaan a reinareʼex tin wéetel teʼ kaʼanoʼ. Beeteʼex cada año lelaʼ utiaʼal a kʼaʼajsikeneʼex›. Teʼ kʼiinoʼobaʼ u disipuloʼob Jesuseʼ cada año ku muchʼkubaʼob utiaʼal u kʼaʼajsikoʼob le kʼiinbesaj ken tʼúubuk kʼiinoʼ. Lelaʼ ku kʼaabaʼtik u Ookʼin Janal Yuumtsil.

 Ka tsʼoʼok u jaanloʼobeʼ, le apostoloʼoboʼ joʼopʼ u baʼateltʼantikoʼob máax u maas nojchil ichiloʼob. Chéen baʼaleʼ Jesuseʼ tu yaʼalajtiʼob: ‹Le máax maas nojoch ichileʼexoʼ unaj u beetkuba bey u maas chichnileʼ, wa u meyajtik u maasil›.

Jesuseʼ tu yaʼalaj xan tiʼob: ‹Teʼexeʼ in amigoʼex. Le oʼolal kin waʼalikteʼex tuláakal le baʼaxoʼob u kʼáat in Taata ka a wojéelteʼexoʼ. Maʼ kun xáantal ken suunaken teʼ kaʼan teʼ tuʼux yaan in Taataoʼ. Chéen baʼaleʼ teʼexeʼ yaan a pʼáatleʼex wayeʼ. Le máakoʼoboʼ yaan u yojéeltikoʼob teʼex in disipuloʼex yoʼolal le yaabilaj ken a weʼeseʼexoʼ. Unaj a paklan yaabiltikabaʼex jeʼex teen tsʼoʼok in yaabiltikeʼexoʼ›.

Tu tsʼoʼokeʼ Jesuseʼ tu beetaj junpʼéel oración utiaʼal u kʼáatik tiʼ Jéeoba ka u kanáant u disipuloʼob yéetel utiaʼal ka u yáantoʼob múuchʼ meyaj. Orarnaj xan utiaʼal u kiliʼichkúuntaʼal u kʼaabaʼ Jéeoba. Ka tsʼoʼokeʼ Jesús yéetel u apostoloʼobeʼ kʼaaynajoʼob tiʼ Jéeoba, tsʼoʼoleʼ ka jóokʼoʼob. Teʼ súutuk jeʼeloʼ maʼ yaʼab u bin u maʼachal Jesusiʼ.