Yesu kɛ bɔfo ɔmɛ nyɛɛ kɛ gu Kedron Dɔgba a mi kɛ ya Oliv Yoku ɔ nɔ nyɔ mi. Jamɛ a be ɔ mi ɔ, ngmlɛ nyɔngma kɛ enyɔ be, nɛ nyɔhiɔ ɔ wa. Benɛ a ya su Getsemane abɔɔ ɔ mi ɔ, Yesu de mɛ ke: “Nyɛɛ hi hiɛ ɔ, nɛ nyɛɛ hi hwɔɔe.” Kɛkɛ nɛ Yesu ya e hɛ mi bɔɔ ngɛ abɔɔ ɔ mi, nɛ e kpla si. Yesu hao wawɛɛ, nɛ e sɔle nɛ e de Yehowa ke: “Ha nɛ nɔ́ nɛ o suɔ ɔ nɛ ba mi.” Kɛkɛ nɛ Yehowa tsɔ bɔfo ko kɛ ya Yesu ngɔ, nɛ bɔfo ɔ wo lɛ he wami. Benɛ Yesu kpale kɛ ba e kaseli ɔmɛ a ngɔ ɔ, e na kaa kaseli etɛ ɔmɛ tsuo hwɔ mahe. E de mɛ ke: ‘Nyɛɛ te si! Tsa pi be nɛ e sa kaa nyɛɛ hwɔ mahe ji nɛ ɔ! Be su nɛ a maa ngɔ mi kɛ ha ye he nyɛli ɔmɛ.’

Be bɔɔ se ɔ, Yudas nyɛɛ nihi fuu a hɛ mi kɛ ba abɔɔ ɔ mi, nɛ a hɛɛ klaatehi kɛ tso kpotihi. Yudas le kaa e maa na Yesu ngɛ lejɛ ɔ ejakaa Yesu kɛ mɛ ya abɔɔ nɛ ɔ si abɔ. Yudas de ta buli ɔmɛ ke e maa tsɔɔ mɛ nɔ nɛ ji Yesu ɔ. E ya Yesu ngɔ tɛ̃ɛ, nɛ e de Yesu ke: ‘Tsɔɔlɔ, mo he manye,’ kɛkɛ nɛ e fĩɔ e nya he. Yesu bi lɛ ke: ‘Yudas, lɔ ɔ o fĩɔ ye nya he konɛ o kɛ tsɔɔ ye se blɔ lo?’

Yesu ya da ni ɔmɛ a hɛ mi, nɛ e bi mɛ ke: “Mɛnɔ nyɛ ngɛ hlae?” A de lɛ ke: ‘Yesu nɛ je Nazarɛt ɔ.’ Kɛkɛ nɛ Yesu ha mɛ heto ke: ‘Imi ji Yesu.’ Ni ɔmɛ gbee senyasenya, nɛ a ya nɔ si. Yesu kpale bi ni ɔmɛ ke: “Mɛnɔ nyɛ ngɛ hlae?” A kpale de lɛ ke: ‘Yesu nɛ je Nazarɛt ɔ.’ Yesu ha mɛ heto ke: ‘I de nyɛ ke imi ji Yesu. Nyɛɛ ngmɛɛ nyumu nɛ ɔmɛ a he nɛ a ho.’

Benɛ Petro na nɔ́ nɛ ngɛ nɔ yae ɔ, e hia klaate, nɛ e po Malko tue. Malko ji osɔfo nɔkɔtɔma a tsɔlɔ. Se Yesu pɛtɛ Malko tue he, nɛ e tsa lɛ. Kɛkɛ nɛ Yesu de Petro ke: ‘Ngɔɔ klaate ɔ kɛ wo e kpo ɔ mi. Ke o hia klaate ngɛ nihi a nɔ ɔ, o ma gbo ngɛ klaate nya.’ Ni ɔmɛ nu Yesu, nɛ a fĩ e nine, nɛ kaseli ɔmɛ tu  fo kɛ je. Kɛkɛ nɛ a ngɔ lɛ kɛ ya ha Anas, nɛ ji osɔfo nɔkɔtɔma a. Anas bi Yesu sanehi fuu, nɛ e ha nɛ a kɛ lɛ ho Kayafa, nɛ ji Osɔfo Nɔkɔtɔma Pe Kulaa a we ɔ mi ya. Se jamɛ a be ɔ, mɛni ba Yesu bɔfo ɔmɛ a nɔ?