Yesu karacelo ku jukwenda gikadhu kud i poga mi Kidron nitundo iwi got Zeituni. Ubino diewor ma ling’ i saa ma dwi uberieny terere i ie. Kinde ma gitundo i podho mi Gethsemane, Yesu uwacu igi kumae: “Wudong’ keni, wuki.” E Yesu umondo i podho kud i gengi moko ma nyalikiliki man ewok epodho aruma conge. Ku can ma lee i cwinye, egam erwo i bang’ Yehova kumae: ‘Dong’ yeny peri timbre.’ E Yehova ugam uoro malaika moko ubin utielo cwinye. Kinde ma Yesu udwogo i bang’ jukwenda pare, enwang’u gibenindo. Ewacu igi kumae: ‘Wuai malu! Eni tie ngo saa m’ukwayu junind i ie! Saa para udaru romo ma jubecimia ko i cing’ judegina.’

E ndhundhu Yuda utundo, m’ebetelo wi udul askari ma gitie ku palamularu man undoi i cing’gi. Eng’eyo kaka m’ecopo nwang’u Yesu i ie, pilembe gibed gicidho wang’ ma pol i podho maeno. Yuda uyero ni juaskari nia ebikonyogi kara ging’ii Yesu. Saa ma gitundo, ewok ecidho atira i bang’ Yesu man ewacu ire kumae: ‘Moth iri, Japonji,’ e ecwio limbe. Yesu uyero ire kumae: ‘Yuda, ibeciba ku cwio limba?’

Yesu ucoro i bang’ udul askari man epenjogi kumae: “Wuyenyo ng’a?” Gidwoko ire kumae: ‘Yesu ma Janazareti.’ Yesu uwacu igi kumae: “An a en,” e dhanu maeno giloko ku ng’eigi man gipodho i ng’om. Yesu upenjo udul askari kendo kumae: “Wuyenyo ng’a?” Gidwoko ire kendo kumae: ‘Yesu ma Janazareti.’ Yesu uloko lembe igi kumae: ‘Adaru wacu iwu nia an a en. Wuwek julub para gicidhi.’

Kinde ma Petro unyang’ i lembe m’ubetimere, ewodho palamularu man etong’o ith Malko ma jatic pa jalam ma dit. Ento Yesu ugam umulo  ith ng’atune man ekeye. I ng’eye, eyero ni Petro kumae: ‘Dwok palamularu peri kakare. Kum tek ibekiedo ku palamularu, in de jubinegi ku palamularu.’ Juaskari gigam gimaku Yesu man gitwio cinge, e jukwenda gilal ku ng’wec. Gitere i bang’ Ana ma tie jalam. Ana uwok upenjo Yesu man eore i ot pa Kayafa ma Jalam ma dit. Dong’ lembang’o m’udok utimo jukwenda?