Zezi nin i akoto mun be sinnin Kidrɔn kongo’n nun be ɔli Olivie oka’n su lɔ. Kɛ ɔ́ yó sɔ’n, nn lika w’a san, yɛ anglo’n ta kpa. Kɛ be juli lika nga be flɛ i Zɛtsemane’n, Zezi seli be kɛ: ‘An minndɛ min wa, nán amun lafi.’ Zezi ɔli i ɲrun lɔ kan, kpɛkun ɔ kotoli. I wla boli i wun dan. Ɔ srɛli Ɲanmiɛn seli kɛ: “Maan ɔ yo kɛ nga a klo’n sa.” Zoova sunmannin anzi kun kɛ ɔ wa wla Zezi fanngan. Kɛ Zezi sɛli i sin i akoto mun be wun lɔ’n, ɔ wunnin kɛ be su lafi. Ɔ seli be kɛ: ‘Amun jaso! Ɔ fataman kɛ amun lafi dɔ nga su. Blɛ m’ɔ fata kɛ be fa min man min kpɔfuɛ mun’n w’a ju.’

Kɛ ɔ yoli sɔ’n, w’a cɛman yɛ Zida bali-ɔ. Sran kpanngban kpa be su i su. Tokofi nin waka o be sa nun. Zida si kɛ Zezi o lika sɔ’n nun lɔ, afin be kɔ lɔ titi. Ɔ seli sonja mun kɛ, sɛ be ju lɔ’n ɔ́ wá klé be Zezi. Ɔ maan ɔ ɔli Zezi wun lɔ trele naan w’a se kɛ: ‘Like klefuɛ, anun-o!’ Kpɛkun ɔ fɛli i nuan’n wɔli Zezi i fuka’n su. Sanngɛ Zezi seli i kɛ: ‘?Zida, a fa ɔ nuan’n wɔ min fuka’n su yɛ a fa min man sran mun-ɔn?’

Zezi wunngeli be wun lɔ, yɛ ɔ seli be kɛ: “?Wan yɛ amun su kunndɛ i-ɔ?” Be tɛli su kɛ: “Zezi m’ɔ fin Nazarɛti’n.” Zezi seli be kɛ: “Min-ɔn.” Be wunngeli siɛn, kpɛkun be finnin ase. Yɛ ɔ usali be ekun kɛ: “?Wan yɛ amun su kunndɛ i-ɔ?” Be tɛli i su kɛ: “Zezi m’ɔ fin Nazarɛti’n.” Zezi seli be kɛ: ‘N seli amun kɛ min-ɔn. Sɛ min ti yɛ amun bali’n, amun yaci min sɔnnzɔnfuɛ mun be nun maan be wɔ.’

Piɛli wunnin kɛ be su wa tra Zezi. I sɔ’n ti’n, ɔ cuɛnnin tokofi kun, ɔ fa kpɛli Ɲanmiɛn ɲrun jranfuɛ dan’n i junman difuɛ mɔ be flɛ i Malkisi’n i su’n. Zezi kannin bian’n i su’n, kpɛkun ɔ yoli i juejue. I sin’n, Zezi seli Piɛli kɛ: “Fa ɔ tokofi’n sie i osu’n nun. Afin be kwlaa nga be tra tokofi nun’n, tokofi yɛ bé fá kún be-ɔ.”  Sonja mun be trali Zezi, be cili i sa mun. Yɛ i akoto mun be wanndili-ɔ. Be fali Zezi ɔli Anin m’ɔ ti Ɲanmiɛn ɲrun jranfuɛ mun be su kpɛn’n i wun lɔ. Anin usɛli i kosan wie mun, kpɛkun ɔ fɛ i ɔli Kaifu m’ɔ ti Ɲanmiɛn ɲrun jranfuɛ dan’n i awlo lɔ. ?Ngue yɛ akoto mun be yoli-ɔ?