Jesus ras rasul-rasulna erdalan ngelewati Lembah Kidron ku Gunung Saitun. Sanga si e bulan purnama, janah nggo lewat tengah berngi. Sanga kalak e seh i taman Getsemane, nina Jesus man kalak e, ‘Timai jenda, tetap kena erjaga-jaga.’ Kenca si e, lawes Jesus ku bas taman e, nce nungkuk ia. Latih kel ukurna, emaka ertoto ia man Jahwe, ‘PeratenNdulah si jadi.’ Nce, ikirim Jahwe me malekat guna mpegegehi Jesus. Sanga Jesus mulih njumpai rasul-rasulna, kepeken kalak e nggo tunduh. Nina man kalak e, ‘Medakken! Enda labo waktuna tunduh! Gundari nggo seh waktuna aku itangkap musuh-musuhku.’

La ndekah kenca si e, reh me Judas ras rombongen kalak si maba pedang ras palu-palu. Ieteh Judas pasti i je Jesus perban rusur kalak e ras ku je. Nggo ikataken Judas man rombongen e kai tandana guna nuduhken Jesus. Ijumpaina Jesus, nce nina, ‘Mejuah-juah, Guru,’ dung e iciumna ia. Nina Jesus me, ‘Judas, ihianatindu atendu aku alu ciumen e?’

Reh me Jesus ndahi rombongen e, nce sungkunna, ‘Ndarami ise ate kena?’ Nina kalak e, ‘Jesus kalak Nasaret.’ Nina Jesus, ‘Aku kalakna,’ nce mundur kalak e dungna ndabuh. Isungkun Jesus ka mulihi, ‘Ndarami ise ate kena?’ Sekali nari kataken kalak e, ‘Jesus kalak Nasaret.’ Nina Jesus ka, ‘Ma nggo kukataken, aku kalakna. Pediat kalak enda lawes.’

Sanga ieteh Petrus maka itangkap kalak e atena Jesus, ibuatna pedang, nce ipotongna asa retap cuping Malkus, anak buah imam si mbelin. Tapi, ipepalem Jesus ka mulihi cuping dilaki e. Nce, nina man Petrus, ‘Ambekken pedangndu ena. Kalak si make pedang, mate pagi iban pedang.’ Dungna, Jesus itangkap, tanna iiket, tapi rasul-rasul kiam. Nce, ibaba kalak e Jesus ku Annas, imam kepala. I je, isungkuni Annas me Jesus, nce ikirimna ia ku rumah Kayapas, Imam si Mbelin. Jadi, uga nasip rasul-rasulna?