Es isch scho nach Mitternacht und de Vollmond lüchtet am Himmel. Jesus und sini Aposchtel laufed dur s Kidrontal zum Ölberg. Wo si im Garte Gethsemane sind, seit Jesus zu ihne: «Warted da und sind ufmerksam.» Er lauft denn es Stück wiiter i Garte ine und chnüület uf de Bode. Er het fescht Angscht und betet zu Jehova: «Din Wille söll passiere.» Jehova schickt denn en Engel, wo Jesus Muet macht. Nachdem gaht Jesus zu sine Aposchtel zrugg, aber si sind iigschlafe. Er seit zu ihne. «Stöhnd uf! Es isch jetzt nid Ziit zum Schlafe! D Stund isch da, wo d Feinde mich chömmed cho hole.»

Glii drufabe chunnt de Judas. Er weiss genau, wo er Jesus findet, wil si ja scho mängisch i dem Garte gsi sind. Er chunnt mit vilne Männer, wo Schwerter und Chnebel debii hend. De Judas het de Soldate versproche, dass er ihne zeigt, wer Jesus isch. De Judas gaht grad zu Jesus here und seit: «Grüezi Lehrer», und git ihm en Kuss. Jesus fragt ihn: «Judas, verratisch du mich miteme Kuss?»

Jesus staht vor d Männer here und fragt si: «Wer sueched ihr?» Si gebed ihm zur Antwort: «Jesus vo Nazareth.» Jesus seit: «Das bin ich.» D Männer göhnd es paar Schritt zrugg und gheied uf de Bode. Jesus fragt si no einisch: «Wer sueched ihr?» Si gebed nomal zur Antwort: «Jesus vo Nazareth.» Jesus seit denn: «Ich hans euch doch grad gseit: Das bin ich. Lönd di andere la gah.»

Wo de Petrus merkt, was los isch, nimmt er es Schwert und haut em Malchus, emene Diener vom Hohe Prieschter, s Ohr ab. Aber Jesus langet s Ohr vom Malchus a und heilt ihn. Er seit zum Petrus: «Tue dis Schwert weg. Wer mit em Schwert kämpft, wird au dur es Schwert umbracht.» D Soldate nehmed Jesus gfange und fessled ihm d Händ. D Aposchtel springed devo. D Männer bringed Jesus zum Oberprieschter, wo Annas heisst. De Annas fragt Jesus us und schickt ihn nachher zum Huus vom Hohe Prieschter Kaiphas. Was mached d Aposchtel echt jetzt?