Jesus novaapostele ve va kayenda mOruronḓu Kidron okuyenda kOndundu yOmiṋinga. Yari ouṱuku, nu tjandje omueze wa tendama. Indu tji va vaza motjikunino tjaGetsemane, Jesus wa tja: ‘Kareye mba nu mu kare katumba.’ Okuzambo Jesus wa ya kokure kaṱiṱi motjikunino na kawora ozongoro. Nombameno onene, eye wa kumba ku Jehova na tja: ‘Ombango yoye nga rire ndja tjitwa.’ Okuzambo Jehova wa hinda omuengeli okuyanḓiparisa Jesus. Indu, Jesus tja yaruka kovaapostele ve, eye we kevevaza ava rara. Eye wa tja: ‘Pendukeye! Indwi karuveze rokurara! Oiri ye ya ku ami okuyandjwa kovanavita nami.’

Tjimanga Judas we ya, e ri pu notjimbumba tjovandu mbe nomangaruvyo nozongwinya. Eye aa tjiwa kutja Jesus me mu vaza pi, orundu owo tjinene aave ya kotjikunino hi. Judas wa raera ovarwe vovita kutja me ve urikire Jesus. Eye wa ya ku Jesus na tja: “Minikwa, Muhonge,” okuzambo e mu hupite. Jesus wa tja: ‘Judas, mo ndji horora noruhupito?’

Jesus we ya komurungu na pura otjimbumba tjovandu mba a tja: “Mamu paha uṋe?” Owo va tja: “Matu paha Jesus waNasaret.” Okuzambo Jesus wa zira na tja: “OwAmi ngu mbi ri Ye,” nu ovarumendu arire tji va yaruka ovihahambunda nave wire pehi. Rukwao Jesus wa pura otjimbumba na tja: “Mamu paha uṋe?” Owo rukwao va tja: “Matu paha Jesus waNasaret.” Jesus wa zira na tja: ‘Ami mbe mu raere rukuru kutja owAmi ngu mbi ri Ye. Iseye ovarumendu mba ve yende.’

Indu Petrus tja muna kutja mape kayenda ye, eye wa nana engaruvyo na kondo okutwi kwaMalkus, omukarere womupristeri omunene. Posiya Jesus wa ṱuna kokutwi kwoMalkus nemu verura. Tjazumbo eye wa tja: ‘Yarura mo  engaruvyo rwoye. Tji mo ru nengaruvyo ove mo ṱengaruvyo.’ Ovarwe vovita va kambura Jesus nave mu kutu komake, novaapostele va tupuka. Tjazumbo otjimbumba tje mu kambura natji mu twara ku Anas omupristeri omunene. Anas wa pangura Jesus nemu hindi kondjuwo yOmupristeri Omunene Kajafas. Nu hapo kwa tjitwa tjike kovaapostele?