Jesus enggau bala rasul iya bejalai ngagai Bukit Kana nengah Lebak Kidron. Maya nya udah tengah malam, lebuh bulan perenama. Lebuh sida datai ba kebun Getsemani, Jesus ngasuh sida: ‘Duduk ditu lalu mengkang bejaga.’ Udah nya, Jesus bejalai jauh mimit lalu nyungkurka diri ke tanah. Enggau ati ti balat tusah, iya besampi ngagai Jehovah: ‘Awakka peneka Nuan nyadi.’ Jehovah lalu nganjung seiku melikat kena meransang Jesus. Lebuh Jesus pulai baru ngagai bala rasul, iya tetemuka sida benung tinduk. Ku Jesus: ‘Dani! Tu ukai maya kita tinduk! Jam udah chukup alai aku deka dijual ngagai munsuh aku.’

Enda lama udah nya, Judas ngulu orang mayuh ke mai pedang enggau pemalu. Iya nemu dini alai ngiga Jesus laban sida seruran datai ngagai kebun nya. Judas udah dulu madah ngagai bala soldadu, iya deka meri tanda kena nunjukka Jesus ke sida. Judas mansang ngagai Jesus lalu ku iya: ‘Tabi, Pengajar,’ udah nya iya nyium Jesus. Ku Jesus: ‘Judas, kati nuan nyual aku ngena sium?’

Jesus mansang ke mua lalu nanya sida ke datai: ‘Sapa ke digiga kita?’ Saut sida: ‘Jesus orang Nasaret.’ Ku Jesus: ‘Aku meh iya,’ bala soldadu nya nyurutka diri lalu rebah ke tanah. Sekali agi Jesus nanya: ‘Sapa ke digiga kita?’ Sida nyaut: ‘Jesus orang Nasaret.’ Saut Jesus: ‘Aku udah madahka kita, aku meh iya. Lepaska sida tu.’

Lebuh Peter nemu utai ti benung nyadi, iya nyintak pedang lalu mantap Malkus, seiku ari ulun imam besai lalu mutuska pending iya. Tang Jesus negu pending Malkus lalu ngeraika iya. Udah nya iya madahka Peter: ‘Selitka pedang nuan, enti nuan ngena pedang, nuan deka mati laban pedang.’ Bala soldadu nangkap Jesus lalu nanchang jari iya. Tekala nya, semua rasul iya rari ninggalka iya. Udah nya, bala soldadu mai Jesus ngagai Anas, seiku tuai imam.  Anas bebendar nanya Jesus lalu nganjung iya ngagai rumah Imam Besai Kaiapas. Tang nama nyadi ngagai bala rasul?