Nagna ni Jesus ken dagiti apostolna iti Tanap ti Kidron a napan iti Bantay dagiti Olibo. Pasado alas dosen iti rabii, ket kabus ti bulan. Idi nakadanondan iti hardin ti Getsemani, imbaga ni Jesus: “Agyankayo ditoy ket agtultuloykayo nga agbantay.” Immadayo bassit ni Jesus sa nagparintumeng. Mariribukan unay ket inkararagna ken Jehova: ‘Matungpal koma ti kayatmo.’ Kalpasanna, nangibaon ni Jehova iti anghel a nangpabileg ken Jesus. Idi nagsubli ni Jesus iti ayan dagiti apostol, nakitana a matmaturogda. Imbagana: ‘Agriingkayo! Saan nga ita ti oras tapno maturogkayo! Orasen tapno mayawatak kadagiti kabusorko.’

Idi kuan, simmangpet ni Judas a kaduana ti adu a tattao a nakaiggem iti espada ken pang-or. Ammona no sadino ti pakasarakan ken Jesus ta kanayonda idi a mapmapan iti daytoy a hardin. Imbaga ni Judas kadagiti soldado a tulonganna ida tapno mailasinda ni Jesus. Immasideg ken Jesus ket imbagana: ‘Naimbag a rabii, Mannursuro,’ sa binisongna. Imbaga ni Jesus: ‘Judas, traidorennak kadi babaen iti agep?’

Nagpasango ni Jesus ket insaludsodna kadagiti tattao: ‘Asino ti sapsapulenyo?’ Insungbatda: “Ni Jesus a Nazareno.” Insungbat ni Jesus: “Siak dayta.” Napasanud ken natumbada. Insaludsod manen ni Jesus: ‘Asino ti sapsapulenyo?’ Imbagada manen: “Ni Jesus a Nazareno.” Insungbat ni Jesus: ‘Imbagak a siak dayta. Palubosanyo a pumanaw dagitoy a lallaki.’

Idi naawatan ni Pedro ti mapaspasamak, nangala iti espada ket piningasna ti lapayag ni Malco, nga adipen ti nangato a padi. Ngem sinagid ni Jesus ti lapayag ti lalaki ket pinaimbagna. Imbaga ni Jesus ken Pedro: ‘Isublim ti espadam. No  makilabanka babaen iti espada, mataykanto babaen iti espada.’ Tiniliw dagiti soldado ni Jesus ken ginalutanda dagiti imana, ket naglibas dagiti apostol. Dagiti tattao impanda ni Jesus ken Anas a panguluen a padi. Pinagsaludsodan ni Anas ni Jesus sa impaipanna iti balay ti nangato a padi a ni Caifas. Ngem ania ti napasamak kadagiti apostol?