Jizus ku apóstlus trabesa Vali di Sédron i es bai pa Monti di Olivera. Dja pasaba di meia noti i staba lua xeia. Kantu es txiga na jardin di Jetsémani, Jizus fla-s: ‘Nhos spera-m li i nhos fika sienti’. Dipôs Jizus bai más un bokadinhu pa déntu di jardin i el poi duedju na txon. Ku grandi tristéza, el fla Jeová na orason: ‘Faze bu vontadi.’ Nton Jeová manda un anju pa da Jizus koraji. Kantu Jizus volta, el atxa se apóstlus ta durmi. El fla-s: ‘Nhos labanta! Kel-li é ka óra pa nhos sta ta durmi! Dja txiga óra pa N kai na mô di nhas inimigu.’

Lógu Judas txiga ku un grupu di algen armadu, es tinha spada ku pó. El sabia undi ki el ta atxaba Jizus, pamodi txeu bês es ta baba kel jardin. Judas dja flaba kes trópa ma el ta mostraba kal ki éra Jizus. El bai rétu Jizus i el fla-l mantenha, i dipôs el da-l un beju. Jizus fla-l: ‘Judas, bu sta trai-m ku un beju?’

Jizus anda un bokadinhu pa frenti i el pergunta kes trópa: ‘Kenha ki nhos sta ta djobe?’ Es fla: ‘Jizus di Nazaré’. Nton el responde: ‘É mi’. Kes ómi da pa tras i es kai na txon. Jizus torna pergunta-s: ‘Kenha ki nhos sta ta djobe?’ Es torna fla: ‘Jizus di Nazaré’. Jizus responde: ‘Dja N fla nhos ma é mi. Nhos dexa kes ómi li bai.’

Kantu Pedru odja kuzê ki sta ta kontise, el puxa spada i el korta orédja di un skravu di saserdóti prinsipal ki txomaba Malku. Má Jizus poi mô na orédja di kel ómi i el kura-l. Dipôs el fla Pedru: ‘Poi spada na se lugar. Si bu briga ku spada, é spada ki ta mata-u.’ Kes trópa pega Jizus i es  mara-l mô. Má apóstlus fuji. Nton kel grupu di algen armadu leba Jizus pa Anás, ki éra xéfi di saserdótis. Anás faze Jizus perguntas i dipôs el manda-l pa kaza di Kaifás, ki éra Saserdóti Prinsipal. Má kuzê ki kontise ku apóstlus?