Mi Chiisu nda kiilaa nduaa keeku o Kpoloŋndo Kidilɔŋ, ma kua haaa o Pembii Ɔlifiive choo. Ditɛɛŋndo ndoo hiou niŋ, nduyɛ paŋgei wa diondɔɔ. Mɛɛ nda fuuluu o kpeloo Kɛsɛmani, mi Chiisu dimul nda aa: “La lo pɔɔ nanuŋ nduyɛ mi la wa lahɔl.” Okoŋ mi Chiisu kua tiŋ lachi o kpeloo niŋ, mbo kɔ baŋ wulaŋ. Mɔnɛi wa ndu i piaa o kɔl, okoŋ mbo piɛi o Chɛhowa lo aa: “Maa hɛnaŋ numndo tosaŋ.” Mi Chɛhowa yɔŋ maalikɛinɔɔ le Chiisu kɔllo dɛɛniaa. Mɛɛ Chiisu miiŋgu o kiilaa nduaa lo, mbo komal a yaa o luaŋ. Mbo dimul nda aa: ‘La tiondu! O cho teleŋ wana lɔl te cho hoo le! Teleŋndo fuuluu le ma mal la yaamɔɔwaa niaa o ba.’

Nyɔɔ viu bɛɛ le, mi Chuda huŋ a faŋga bɛndoo ndu kɔɔli. Nduyɛ, mɔɔŋ a yɔmnde wa nda o laba. Ndoo sina naa Chiisu wa wa, kanifuule teleŋnda bɔɔbɔɔ, mi ndaa hiŋ o kpele koŋ niŋ. Chuda ndoo dimul niŋ puaa chɔuwa maa o cho nda chɔm wana cho Chiisu wo. Mbo kua sakpo naa Chiisu chua, mbo kɔ yil ndu aa: ‘Isɛ Wana Pɛɛkaa.’ Okoŋ, mbo sɔsa ndu kuuwo. Mi Chiisu nyuna ndu aa: ‘Baa le ya pisioo ŋ sɔsa ya kuuwo ni?’

Mi Chiisu fula faŋga koŋ o hɔl, mbo nyuna nda aa: “Nɛɛnɛ nya cho yɛ nuuviaa?” Ma dimul ndu aa: “Chiisu fula Naasaluɛiyo.” Mbo mulul nda aa: “Ya cho Chiisu ni.” Mi puaa miiŋgu amakɔɔ, ma deli lɛŋ. Mi Chiisu nyuna nda vɛlɛ aa: “Nɛɛnɛ nya cho yɛ nuuviaa?” Ma dimul ndu vɛlɛ aa: “Chiisu fula Naasaluɛiyo.” Mi Chiisu mulul nda aa: ‘I dimul nya maa ya cho Chiisu ni. La mal puaa haa ma kuɛŋnuŋ.’

Mɛɛ Pitɛ che nyɛ wa yɔŋnɔŋndo wo, mbo naŋ muɛi o boo niŋ, mbo kialu buɛi masa wanaa soliaa lasalaa nileŋ. Buɛi koŋ ndoo nɔ diolaŋ ni aa Makɔɔ. Kɛ mi Chiisu pilaŋ poo nileŋ mbo siŋgi ndu. Mbo dimul Pitɛ aa: ‘Miŋgi muɛi numnde o boo niŋ. Te a sɔŋga a muɛi pɛ, a muɛi nda cho num diyɔɔ ni.’ Mi puaa chɔuwa  bii Chiisu, ma yii ndu balaŋ, nduyɛ mi kiilaa nduaa nyaanuŋ. Ma kua a ndu o masa wanaa soliaa lasalaa lo diolaŋ aa Anasi. Mɛɛ Anasi nyuuniaa Chiisu, mbo yɔŋ ndu o Kayafaa lo. Nduyɛ Kayafaa wa Wana Bɛndu Wanaa Soliaa Lasalaa ni. Kɛ yɛɛnɛ ndoo yɔŋnuŋ yɛ a kiilaa nduaa?