တၢ်မၤလိ ၈၈
ပှၤဖီၣ်န့ၢ်ယ့ၣ်ၡူး
ယ့ၣ်ၡူးဒီးအတၢ်မၢဖိတဖၣ် ခီဂာ်ဝဲကံဒြိၣ်အကျိ ဒီးလဲၤဝဲဆူကစၢၢ်သ့ၣ်စၤယံးလီၤ. ဘၣ်ဖဲဖးဖီမုၢ် ဒီးလါပှဲၤဝဲအခါန့ၣ်လီၤ. ဖဲအဝဲသ့ၣ်လဲၤတုၤလၢ ကရၢၢ်က့ၤသစ့းမနၤအခါ ယ့ၣ်ၡူးတဲဘၣ်အဝဲသ့ၣ်လၢ– “အိၣ်ဖဲအံၤဒီးဆိးသီတက့ၢ်.” ဝံၤဒီး ယ့ၣ်ၡူးလဲၤယံၤထီၣ်ဒီးအဝဲသ့ၣ်တစဲး ဒီးချံးလီၤအခီၣ်လီၤ. လၢတၢ်သူၣ်ကိၢ်သးဂီၤအပူၤ ယ့ၣ်ၡူးဃ့ဘါထုကဖၣ်တၢ် ဆူယဟိဝၤယွၤအအိၣ်လၢ– ‘မ်အမ့ၢ်ဒ် နတၢ်ဘၣ်သးအသိးတက့ၢ်.’ ဝံၤဒီးယဟိဝၤယွၤဆှၢလီၤဝဲ မူခိၣ်ကလူးတဂၤဒ်သိး ကဟ့ၣ်ဂံၢ်ဟ့ၣ်ဘါယ့ၣ်ၡူးအဂီၢ်လီၤ. ဖဲန့ၣ်ဝံၤအလီၢ်ခံ ယ့ၣ်ၡူးဟဲက့ၤဝဲဆူအတၢ်မၢဖိတဖၣ်အအိၣ် ဒီးယ့ၣ်ၡူးထံၣ်ဝဲလၢ အတၢ်မၢဖိသၢဂၤန့ၣ် မံဘၣ်အသးလီၤ. ဒီးယ့ၣ်ၡူးတဲဘၣ်အဝဲသ့ၣ်လၢ– ‘ဂဲၤဆၢထၢၣ်သၢၣ်. ခဲအံၤန့ၣ် တမ့ၢ်တၢ်ဆၢကတီၢ်လၢ သုကမံအဂီၢ်ဘၣ်. နၣ်ရံၣ်ဘၣ်လံ, တၢ်ကဟ့ၣ်လီၤကွံာ်ယၤလၢ ဒုၣ်ဒါတဖၣ် အစုပူၤလီၤ.’
တယံာ်ဘၣ်ဒီး စီၤယူဒၤဟဲကိးဝဲ ပှၤဂီၢ်မုၢ်ဒီးပှၤသုးဖိတဖၣ်လၢ အအိၣ်ဒီးနးဒီးနီၣ်တီၢ်လီၤ. ခီဖျိလၢယ့ၣ်ၡူးဒီးအတၢ်မၢဖိတဖၣ် ညီနုၢ်လဲၤဝဲလၢကရၢၢ်က့ၤသစ့းမနၤအဃိ စီၤယူဒၤသ့ၣ်ညါဝဲလၢ ယ့ၣ်ၡူး ကအိၣ်ဖဲန့ၣ်လီၤ. စီၤယူဒၤတဲပာ်စၢၤ ပှၤသုးဖိတဖၣ်လၢ အဝဲကဒုးနဲၣ်အဝဲသ့ၣ်လၢယ့ၣ်ၡူးလီၤ. အဃိအဝဲလဲၤဆူယ့ၣ်ၡူးအအိၣ် ဒီးတဲဝဲလၢ– ‘သရၣ်ဧၢ, မ်နအိၣ်ဆူၣ်တက့ၢ်.’ ဝံၤဒီးအဝဲနၢမူယ့ၣ်ၡူးလီၤ. ယ့ၣ်ၡူး တဲဆၢက့ၤအီၤလၢ– ‘စီၤယူဒၤဧၢ, နဆါလီၤအီၣ်ကွံာ်ယၤလၢ နတၢ်နၢမူတထံၣ်အံၤဧါ.’
ယ့ၣ်ၡူးသုးဘူးအသး ဒီးသံကွၢ်ပှၤဂီၢ်မုၢ်လၢ– “သုဃုမတၤတဂၤလဲၣ်.” အဝဲသ့ၣ်စံးဆၢက့ၤဝဲလၢ– “ပှၤနစၤရ့းဖိယ့ၣ်ၡူးလီၤ.” ဝံၤဒီးယ့ၣ်ၡူးတဲဆၢဝဲလၢ– “မ့ၢ်ယၤလီၤ.” ဒီးပှၤပိာ်ခွါတဖၣ်န့ၣ် သုးလီၤက့ၤအသးလၢအလီၢ်ခံ ဒီးလီၤဃံၢ်လၢဟီၣ်ခိၣ်လိၤလီၤ. ယ့ၣ်ၡူးသံကွၢ်ကဒီး ပှၤဂီၢ်မုၢ်လၢ– “သုဃုမတၤတဂၤလဲၣ်.” ဒီးအဝဲသ့ၣ်စံးဆၢကဒီးဝဲလၢ– “ပှၤနစၤရ့းဖိယ့ၣ်ၡူးလီၤ.” ယ့ၣ်ၡူးတဲဆၢက့ၤကဒီးဝဲလၢ– ‘ယတဲဘၣ်သုဝံၤလံ, ယမ့ၢ်ပှၤနစၤရ့းဖိယ့ၣ်ၡူးလီၤ. မ့မ့ၢ်ယပျဲၢ်ယဘီၣ်တဖၣ်အံၤန့ၣ် ပျၢ်ကွံာ်အဝဲသ့ၣ်တက့ၢ်.’
ဖဲစီၤပ့းတရူးသ့ၣ်ညါဝဲလၢ ပှၤကဖီၣ်ယ့ၣ်ၡူးအခါ အဝဲထုးထီၣ်နးဒီး ကျီဝဲပှၤလုၢ်တၢ်အခိၣ်အခ့အပှၤ စီၤမါလဃူးအနၢ်ကုလီၤ. ဘၣ်ဆၣ် ယ့ၣ်ၡူးဖီၣ်ဝဲပိာ်ခွါအံၤအနၢ် ဒီးမၤဘျါက့ၤအီၤလီၤ. ဝံၤဒီး ယ့ၣ်ၡူးတဲဘၣ်စီၤပ့းတရူးလၢ– ‘ပာ်က့ၤနနးတက့ၢ်. နမ့ၢ်ဒုးတၢ်ဒီးနးန့ၣ် နကသံလၢနးလီၤ.’ ပှၤသုးဖိတဖၣ်ဖီၣ်ဝဲယ့ၣ်ၡူး ဒီးစၢထီၣ်ဝဲအစုလီၤ.
ဒီးအတၢ်မၢဖိတဖၣ် ဃ့ၢ်ကွံာ်ဝဲလၢအယံၤလီၤ. ဝံၤဒီး ပှၤဂီၢ်မုၢ်တဖၣ်က့ၤကိးဝဲယ့ၣ်ၡူးဆူ ပှၤလုၢ်တၢ်အဒိၣ် စီၤအၣ်နၣ်အအိၣ်န့ၣ်လီၤ. စီၤအၣ်နၣ်သံကွၢ်ယ့ၣ်ၡူးဝံၤဒီး ဆှၢက့ၤယ့ၣ်ၡူးလၢပှၤလုၢ်တၢ်အခိၣ် စီၤကၤယါဖၤအအိၣ်လီၤ. ဘၣ်ဆၣ် တၢ်မၤအသးဒီးယ့ၣ်ၡူးအတၢ်မၢဖိတဖၣ်ဒ်လဲၣ်.“လၢဟီၣ်ခိၣ်အံၤ, သုကဘၣ်တၢ်ဖှီၣ်လီၤ. ဘၣ်ဆၣ်ဒီးပာ်သုသးခူတလ့ၢ်တက့ၢ်. ယမၤနၢၤလံဟီၣ်ခိၣ်လံ.”—ယိၤဟၣ် ၁၆:၃၃