Jesus novapositoli vendi tava gendi va pite momuramba gwaKidironi va ze koNdundu zoMauzwe. Kwa kere pokatji komasiku, ako kwedi kuna terama. Apa va ya sikire mosikunino, Gesemani, Jesus ta va tantere asi: “Kareni paapa oku tomu vangarara.” Jesus ta linapuka nawo kanunu, makura ta tu nongoro pevhu. Morwa kukara neguwo, ta kanderere kwaJehova asi: ‘Mpango zoge zi sike mo.’ Jehova ta tumu muengeli a ya nkondopeke Jesus. Apa Jesus ga tengwire, ta ka gwana vapositoli vatatu vana rara. Ta tanta asi: ‘Pindukeni! Esi kapi siruwo sokurara! Siruwo sina siki mo sokugava nge momawoko gononkore dange.’

Va tara ko, Judasa kuna kuwiza nombunga zonene zina simbi nomfuro nonomuramu. Age ga divire oku na gwana Jesus morwa pamwe nga zi nage kosikunino oso. Age kwa pere sidiviso vakwayita sokudimbwilisa Jesus. Judasa ta hedere Jesus nokutanta asi: ‘Moro, Murongi! Makura ta mu ncumita.’ Jesus ta tanta asi: ‘Judasa, nyame ono kugombekesa kencumito ove?’

Jesus ta hedere mbunga nokuzipura asi: “Yilye ogu muna kupapara?” Tava mu limburura asi: “Jesus Munasareta.” Jesus ta va tantere asi: “Nyame ogu,” makura tava tengura sinderenyima, tava ligandere pevhu. Jesus ta va pura hena asi: “Yilye muna kupapara?” Tava limburura asi: “Jesus, Munasareta.” Jesus ta limburura asi: ‘Amesi nare nina mu tantere asi nyame ogu. Sigeni ava va ze.’

Apa Peturusa ga yi mwene eyi yina kuhoroka, makura ta pweza mo rufuro rwendi, ta kamuna kutwi kwaMalikusa, mukareli gomupristeli gomunene. Nye Jesus ta gumu kutwi kogo mukareli, ta mu verura. Makura ta tantere Peturusa asi: ‘Zweka mo rufuro roge mosiraro.  Nkenye ogu a kwata rufuro, yiro ngaru mu lya rooro.’ Mbunga zovakwayita tazi kwata Jesus, tava mu manga, ano vapositoli tava duka. Makura tava mu twara komupristeli Anasi. Age ta toona Jesus nokumutuma komupristeli gomunene, Kayifasa. Nye yisinke ya horokerere vapositoli?