Yesu ne batumibwa bāpityile dya mu Musanza wa Kidelone, bāenda ku Lūlu lwa Impafu. Kyādi kitatyi kikalanga kweji ke mutuntulu, kupwa kwa pa bukata bwa bufuku. Abo pa kufika ku budimi bwa Ngesemani, Yesu wēbanena’mba: “Shalai pano kadi keshai’nka kukesha.” Kupwa, Yesu wāenda kulampe’ko mu buno budimi, wāfukata manwi panshi. Koku muvutakanibwe ñeni bininge, wālombela Yehova amba: “Kiswa-mutyima kyobe kilongeke.” Penepo Yehova wātuma mwikeulu umo kukankamika Yesu. Yesu pa kujokela kudi batumibwa, wātana batumibwa basatu balēle tulo. Wēbanena’mba: ‘Langukai! Kino ke kitatyipo kya kulāla! Nsá ibafika ya kungaba mu makasa a balwana nami.’

Kepāijijepo kala Yudasa wāfika, utangidile kibumbo kya bantu baselele mpete ne mipebwe. Yudasa wādi uyukile kwa kutana Yesu, mwanda bādi bavudile kala kwenda mu buno budimi. Yudasa wāsapwidile basola amba nsa kwimusokwela Yesu. Wāenda pityipityi kudi Yesu, wāmwimuna’mba: ‘A Mufundiji, naimuna,’ kupwa wāmufifya. Penepo Yesu wāmwipangula’mba: ‘A Yudasa, le koungaba na kumfifya?’

Yesu wāpita kumeso, wāipangula kibumbo amba: “Le i ani omukimba?” Nabo balondolola’mba: “I Yesu mwine Nazala.” Ebiya Yesu wēbalondolola’mba: “Ami uno,” ponka’po bantu bājoka kimvunda-nyuma bāpona pa nshi. Kadi Yesu wēbepangula monka’mba: “Le i ani omukimba?” Nabo bālondolola monka’mba: “I Yesu mwine Nazala.” Yesu wēbanena’mba: ‘Nemulombola’mba ami uno. Lekai bano bantu bende.’

Petelo pa kumona ino myanda yonso, wāsomona kipete, wāketa kutwi kwa Makusa, umpika wa kitobo mukatampe. Ino Yesu wākwata kutwi kwa muntu’wa, wāmulamika’ko. Ebiya wālombola Petelo amba: ‘Tūla kipete kyobe kulampe. Shi ulwa na kipete, nobe ukafwa ku kipete.’  Basola bākwata Yesu, bāmukuta ku makasa, batumibwa bānyema. Kupwa, kibumbo kyākatwala Yesu kwa Anasa, kitobo mukulu. Anasa wāsambija Yesu ne kumutuma ku njibo ya Kaifasa Kitobo Mukatampe. Ino le i bika byāfikile batumibwa?