Yesu na atumwa yakwe yapisile mu mumukonko wa Kiduloni iyaya uku Mwamba wa miolivi. Yali insita ya usiku sana ala nu umwezi iuwala. Lino yafisile pa calo ca Getisemani, Yesu wayaneenyile ati: “Ikalini paa nu kutwalilila ukulola.” Lyene Yesu waileko akatalamukila mu calo kwene cico nu kufukama. Wapefile kuli Yeova ala ali sana nu ulanda ati: “Leka ukulonda kwako kucitike.” Lyene Yeova watumile malaika kuti akakomelezye Yesu. Lino Yesu waswilile wazanyile atumwa iyalaala. Wayaneenyile ati: ‘Zyukini! Ii asi insita ya kulaala! Insita yatifika iyakuti mpeelwe uku yalwani yane.’

Lino papisile sile insita inono, Yuda wafisile ala ali ni umba lya yantu ilikalamba aasenzile ya panga ni intuwa. Wamanyile kuno Yesu wali pano ilingi Yesu wayanga uku calo kwene cici. Yuda waneenyile asilika ukuti wali nu kucita vimwi ivyali nu kulenga yamanye Yesu. Waile kuli Yesu nu kumuneena ati: ‘Mwapoleni, Kasambilizya,’ lyene wamutonswile. Yesu walanzile ati: ‘Yuda, uzye ukuntonsola pakuti ufuntuke?’

Yesu waile pa nkoleelo yi umba nu kuyuzya ati: “A weni wino mukulonda?” Nayo yatiile: “Yesu uwa ku Nazaleti.” Nawe waswike ati: “Anene kwene,” lyene yawelile icisila nu kupona pansi. Nupya kwene Yesu wayuzizye ati: “A weni wino mukulonda?” Nupya kwene yatiile: “Yesu uwa ku Nazaleti.” Yesu wayaneenyile ati: ‘Iimuneena nati anene kwene. Lekini aonsi yaa yapita.’

Lino Petulo wamanyile ivyacitikanga, wasomwile ulupanga nu kuputula ikutwi lyakwe Makasi, muomvi wakwe simapepo mukalamba. Lelo Yesu walemile ikutwi lya monsi wii, nu kumupozya. Lyene waneenyile Petulo ati: ‘Swilizya ulupanga lwako muno lukaikala. Ndi cakuti ukaomvya  ulupanga pa kulwa, ala ulafwila uku lupanga.’ Asilika yalemile Yesu nu kumunyepa amakasa, lyene atumwa yonsi yutwike. Antu yasenzile Yesu kuli Anasi, intunguluzi yakwe ya simapepo. Lyene Anasi uzizye Yesu amauzyo nupya wayaneenyile ukuti yamusende uku ng’anda yakwe Simapepo Mukalamba Kayafa. Nomba i vyani ivyacitike uku yatumwa?