Yesu na vandongesi veni va hitile mu cimbongo ca Ketelone kuya ku muncinda ua Oliveta. Ntsimbu yaco ya puile ku vandemba, kaha kua kele miezi. Mu va ka hetele mu citungu ca Ngetesemane, Yesu ua handekele ngueni: “Salenu hano, kaha vingilenu.” Kaha Yesu ua ile mu citungu, ua tsikamene na ku vundila. Na vusiua vua kama ua vundilile kuli Yehova ngueni: “Cizango cove, va ci linge.” Kaha Yehova ua tumine kangelo mu ku kaniamesa Yesu. Omo Yesu ua hilukile ku vapostolo veni, ua va uanene va na kosa. Ua va leka ngueni: ‘Hindukenu! Ino kati ntsimbu ya ku kosa! Ola inapuho ya ku nji hana mu mavoko a vitozi vange.’

Haze vene Yundasa uezile oku na tuamenena civunga ca kama va na ambata mikuale na vimbueti. Ua tantekeyele kuiko a hasa ku uana Yesu muomu vintsimbu via vingi va kele na kuya mu citungu caco. Yundasa ua lekele masualale ngueni a ka va lekesa iya Yesu. Kaha ua ile kuli Yesu na ku handeka ngueni: ‘Hinduka, Mulongisi,’ kaha ua mu tsuembele. Yesu ua handeka ngueni: ‘Yundasa, yange uenda vungungu mu ku nji tsuemba?’

Kaha Yesu ua va suenene na ku va hula ngueni: “Iyandzo mu ku lengeya?” Va mu kumbuluile nguavo: “Yesu ua ku Nazaleta.” Kaha ua kumbuluile ngueni: ‘Yange vene,’ ngeci va mu sondolokele na ku uila ha mavu. Yesu ua hulile naua mbunga ngueni: “Iyandzo muli na ku lengeya?” Va handeka naua nguavo: “Yesu ua ku Nazaleta.” Ngeci Yesu ua kumbuluile ngueni: ‘Nja mi leka laza nguange yange vene. Ecelenu ava linga vaye.’

Omo Petulu ua muene via solokele, ua somuene mukuale na ku vatula lituitui lia Maleko, mukuamanda ua sasendote ua kama. Kaha Yesu ua kuatele lituitui lia uze yala, kaha ua mu kanguisile. Ngeci ua lekele Petulu ngueni: ‘Sueka mukuale uove. Nga u lua na mukuale u ka tsa ku mukuale.’ Masualale va kuatele Yesu na ku  mu kuta ku mavoko, kaha vapostolo va tinine. Kaha civunga ca mu tualele kuli Anase, sasendote ua kama. Anase ua sompesele Yesu na ku mu tuma ku ndzivo ya Mukuluntu ua Vasasendote Kayafase. Vunoni vika via solokele ku vapostolo?