Tlajkoyoual Jesús uan iapóstoles yajkej ipan tepetl Olivos uan panokej ipan tlamayamitl Cedrón, ipan nopa youali temitoya metstli. Kema asitoj ne Getsemaní, Jesús kiniljuik: “Nikaj ximokauakaj uan kuali xitlachixtokaj”. Uan Jesús mouejkatlalik kentsi uan motlankuaketski. Tlauel motekipachojtoya, yeka momaijtok uan kiiljuik Jehová: “Ma mochiua tlen ta tijneki”. Uajka Jehová kititlanki se iluikaejketl ma kiyolchikaua Jesús. Teipa, Jesús yajki kampa itstoyaj itokilijkauaj uan kinitato kochtoyaj. Yeka kiniljuik: “¡Xiisakaj! Namantsi amo kinamiki inkochisej. Namantsi nechtemaktilisej ininmako nokualankaitakauaj”.

Judas asito ininuaya miakej katli kiuikayayaj ininespadas uan ininkua. Kimatiyaya kanke kipantiskia Jesús, pampa ya uan sekinok apóstoles miakpa yajtoyaj iuaya Jesús ne Getsemaní. Judas kiniljuijtoya nopa soldados kinnextiliskia ajkia eliyaya Jesús. Yeka xitlauak yajki kampa Jesús itstoya uan kiiljuik: “Tlamachtijketl”, uan kitsoponik. Jesús kiiljuik Judas: “¿Tinechtsoponik pampa tinechtemaktilis?”.

Jesús kinnechkauik nopa maseualmej uan kiniljuik: “¿Ajkia inkitemouaj?”. Inijuantij kiijtojkej: “Jesús, katli eua Nazaret”. Ya kiniljuik: “Na niJesús”. Inijuantij majmajkej uan uetsitoj tlalchi. Jesús sampa kiniljuik: “¿Ajkia inkitemouaj?”. Uan sampa tlanankilijkej: “Jesús, katli eua Nazaret”. Jesús kinnankilik: “Ya niinmechiljuik, na niJesús. Yeka xikinkauilikaj ni tlakamej ma yakaj”.

Kema Pedro kiitak tlen panoyaya, kikixtik se espada uan kitekilik inakas se tlakatl katli motokaxtiyaya Malco, katli kitekipanouayaya nopa sumo sacerdote. Jesús kiitskik inakas nopa tlakatl uan kichikajki, uan kiiljuik Pedro: “Xikajokui moespada. Pampa tlaj titlateuis ika espada, mitsmiktisej ika espada”. Nopa soldados kiitskijkej Jesús uan kimailpijkej. Jesús iapóstoles  cholojtejkej. Teipa, nopa maseualmej kiuikakej Jesús kampa itstoya nopa sacerdote Anás, katli tlayakanayaya. Anás kitlatsintokilik Jesús miak tlamantli, uan teipa kititlanki ichaj sumo sacerdote Caifás. Uan, ¿tlake panok ika nopa apóstoles?